Міністэрства замежных спраў Расеі палічыла некарэктнай заяву намесьніка старшыні партыі БНФ Рыгора Кастусёва «пра адсутнасьць поўнага кантролю» за незаконным трафікам наркатычных рэчываў на расейска-беларускай мяжы. Разам з тым расейскае ведамства прызнала, што разавыя пастаўкі наркотыкаў могуць быць.
Рыгор Кастусёў настойваў, што такі кантроль мусіць быць узмоцнены, бо наркотыкі і зброя, на ягоную думку, амаль безь перашкодаў трапляюць у Беларусь праз «адкрытасьць мяжы з Расейскай Фэдэрацыяй».
«Відавочна, што пры адсутнасьці на тэрыторыі Саюзнай дзяржавы памежнага кантролю адсочваць магчымыя разавыя перавозкі грамадзянамі рэчываў нашмат складаней, чым на яго вонкавых межах», — адзначаецца ў адказе на ліст беларускага палітыка з другога дэпартамэнту краінаў СНД расейскага МЗС.
«Я атрымаў пацьверджаньне, што на мяжы Беларусі з Расеяй няма ніякага кантролю за перасоўваньнем наркатычных рэчываў. Гэта чытаецца ў адказе зь ведамства Лаўрова, — камэнтуе ліст з МЗС Расеі Рыгор Кастусёў. — Гаворку на тэму ўзмацненьня кантролю на мяжы з Расеяй мы будзем працягваць і будзем дамагацца, каб улады прыслухаліся да нашых перасьцярогаў. Наркотыкі і „спайсы“ трапляюць у Беларусь, і ад іх гіне наша моладзь».
Раней Рыгор Кастусёў атрымаў адказ з Галоўнага ўпраўленьне наркакантролю і процідзеяньня гандлю людзьмі крымінальнай міліцыі Беларусі. Яно таксама адпісала палітыку, што ня бачыць неабходнасьці ва ўзмацненьні кантролю на беларуска-расейскай мяжы.