Лінкі ўнівэрсальнага доступу

Полацкага прафсаюзнага лідэра будуць судзіць за пікет супраць уласнага звальненьня


Мікола Шарах – з прафсаюзным сьцягам

Мікола Шарах – з прафсаюзным сьцягам

У Полацкім РАУС спадару Міколу Шараху прызначылі дату судовага разьбіральніцтва — 12 траўня.

У пастарунак актывіст СПБ трапіў па сканчэньні прафсаюзнага пікету, падчас якога праваахоўнікі не выказвалі да ўдзельнікаў ніякіх прэтэнзій.

Пікет праходзіў каля кінатэатра “Радзіма”

Пікет праходзіў каля кінатэатра “Радзіма”

«Я вяртаўся дахаты. Толькі заходжу ў пад’езд, як сьледам ляцяць два чалавекі з крыкамі «Эй, мужык, пастой!» ці нешта ў такім духу. Дзьверы ў пад’езд зачыняюцца марудна, і яны пасьпелі ўскочыць. А я не пасьпеў дайсьці да сваёй кватэры — гэтыя двое на мяне накінуліся ззаду. Я хацеў вырвацца, прычым дужа сябе стрымліваў: у мяне досыць моцы, каб пакласьці гэтых дваіх на падлогу... На шум зьбегліся суседзі, закрычалі : «Коля, мы ўжо выклікалі міліцыю, зараз цябе прыедуць ратаваць». І толькі тады гэтыя двое сказалі: «Дык мы і ёсьць міліцыя». Якая вы міліцыя, калі ў цывільным, сябе не называеце, пасьведчаньняў не паказваеце? Тут дасталі і пасьведчаньні. Але я ж без акуляраў ня бачу, а рукі мне закруцілі... Карацей, сказалі мне, што беглі сьледам, «каб высьветліць асобу». Чаго яе высьвятляць? У мяне пры сабе і пашпарт, і пасьведчаньне з працы. Не, кажуць, усё адно трэба ехаць у райаддзел. Мы паехалі на іхняй машыне, якая таксама была не службовая. А суседзі засталіся разьбірацца з нарадам, які прыехаў на выклік», — распавёў Свабодзе Мікола Шарах.

Мікола Шарах каля райаддзела міліцыі

Мікола Шарах каля райаддзела міліцыі

У пастарунку актывісту сказалі, што ён затрыманы за ўдзел у несанкцыянаваным пікеце. Шарах заявіў, што хоча мець адваката, паколькі справа ўжо дайшла да складаньня пратаколу. Аднак у гэтым яму адмовілі — заявілі, што адваката можна мець толькі ў тым выпадку, калі вядзецца пра крымінальную справу. А на яго склалі два пратаколы па дзьвюх адміністрацыйных справах: за несанкцыянаванае пікетаваньне і за непадпарадкаваньне міліцыянтам — падчас затрыманьня ў пад’езьдзе.

Міколу Шараха пратрымалі ў пастарунку болей, чым належныя тры гадзіны. Пра гэта ён яшчэ зьбіраецца напісаць скаргу. Дзьве скаргі ў пракуратуру ўжо падаў: пра налёт у пад’езьдзе і пра тое, што яго пазбавілі права на абарону. Удзельнікі пікету, Мікола Шарах і ягоны паплечнік Віктар Стукаў, зазначаюць, што падчас пікету ніякіх заўвагаў ад супрацоўнікаў міліцыі не было. Хаця пікетоўцаў увесь час здымаў апэратар у цывільным. Праўда, падыходзіла супрацоўніца ідэалягічнага аддзелу Натальля Ганебная, гаворыць Віктар Стукаў:

Падчас пікету

Падчас пікету

«Падышла і спытала, ці ёсьць у нас дазвол. Я сказаў, што няма і забароны. Бо адказу на сваю заяўку ў райвыканкам мы ўвогуле не атрымалі. Зрэшты, у гэтай заяўцы мы дазволу не прасілі, бо гэта было прафсаюзнае мерапрыемства. І ў адпаведнасьці з артыкулам 3 Канвэнцыі Міжнароднай арганізацыі працы № 87 аб свабодзе аб’яднаньняў і абароне права аб’ядноўвацца ў прафсаюзы дзяржаўныя ўлады ня маюць права замінаць прафсаюзнай дзейнасьці ў любой яе форме, у тым ліку і падчас масавых акцый».

Прафсаюзны пікет праводзіўся дзеля падтрымкі Міколы Шараха, якога звальняюць з ААТ «Полацак-Шкловалакно». Падтрымаць прафсаюзнага лідэра, якога добра ведаюць у горадзе, прыйшлі і мясцовыя прадпрымальнікі, і калегі, і журналісты, і актывісты дэмакратычных сілаў.

Падчас пікету. Здымае міліцэйскі апэратар

Падчас пікету. Здымае міліцэйскі апэратар

Напрыканцы сакавіка намесьнік кіраўніка «пярвічкі» СПБ на ААТ «Полацак-Шкловалакно» Мікола Шарах атрымаў паведамленьне, што 29 красавіка ў яго апошні працоўны дзень: далей ня будзе працягнуты працоўны кантракт. Ён працуе памочнікам майстра ў цэху вытворчасьці шкловалакна, мае больш за 30 год стажу і найбольшы досьвед працы ў сваім цэху, а таксама дзьве вышэйшыя адукацыі — тэхнічную і юрыдычную. Апрача гэтага, ён зьяўляецца намесьнікам старшыні рэспубліканскага Свабоднага прафсаюзу беларускага.

Мінулы раз кантракт зь ім быў заключаны на 5 гадоў. У пачатку траўня спадару Шараху споўніцца 58 год. Паводле калектыўнай дамовы, з прадпрыемства нельга звольніць працаўніка, якому засталося менш як тры гады да пэнсіі. Аднак непасрэдна перад тым, як папярэдзіць актывіста пра звальненьне, у калектыўную дамову ўнесьлі зьмены. Раней там было сказана, што работніка перадпэнсійнага ўзросту нельга звольніць, калі ён ня меў працоўных спагнаньняў цягам апошняга году. Аднак 1 сакавіка, якраз напярэдадні падзеяў зь Міколам, у калектыўную дамову запісалі, што спагнаньняў нельга мець за ўвесь тэрмін апошняга працоўнага кантракту. У выпадку Міколы Шараха— гэта 5 гадоў, і за гэты тэрмін адміністрацыя знайшла пару зачэпак —спазьненьне на працу на 10 хвілін у 2014 годзе, парушэньне інструкцыі па ахове працы ў 2012 годзе і нават прагул у 2012 годзе — калі Мікола езьдзіў на сэмінар у замежжа.

«Імкненьне адміністрацыі ААТ «Полацак-Шкловалакно» пазбавіцца ад прафсаюзнага актывіста можна патлумачыць толькі адным: дыскрымінацыяй па прыкмеце сяброўства ў незалежным прафсаюзе і нежаданьнем мець на прадпрыемстве чалавека, які стварае «праблемы» для кіраўнікоў — дапамагае рабочым адстойваць свае працоўныя правы, лічыць Віктар Стукаў, кіраўнік «пярвічкі» СПБ на прадпрыемстве «Полацак-Шкловалакно».

Пра затрыманьне пасьля пікету, на якім абмяркоўвалі падрабязнасьці звальненьня, стала вядома сябрам незалежных прафсаюзных суполак зь іншых гарадоў Беларусі. Яны выказваюць падтрымку і намер прыехаць на судовы працэс.

XS
SM
MD
LG