Беларусь на ўзаемнай аснове захоўвае сваю дыпляматычную прысутнасьць у Ізраілі.
Пра гэта паведаміў сёньня на брыфінгу прэсавы сакратар Міністэрства замежных спраў Беларусі Дзьмітры Мірончык:
«Разгледзеўшы ноту, атрыманую па дыпляматычных каналах з інфармацыяй аб прынятым прэм’ер-міністрам Дзяржавы Ізраіль рашэньні захаваць прысутнасьць у Беларусі ізраільскай дыпмісіі ў ранейшым фармаце, беларускі бок прыняў рашэньне аб захаваньні сваёй дыпляматычнай прысутнасьці ў Ізраілі... Зыходзім з таго, што падтрыманьне адносін паміж Беларусьсю і Ізраілем на роўні амбасад — аб’ектыўная неабходнасьць, абумоўленая цеснымі сувязямі дзясяткаў тысяч людзей, для якіх Ізраіль і Беларусь зьяўляюцца блізкімі і роднымі краінамі, а таксама ў цэлым пазытыўнай дынамікай двухбаковых адносін у розных сфэрах».
Міністэрства замежных спраў Беларусі атрымала афіцыйную ноту са зьнешнепалітычнага ведамства Ізраіля пры канцы сакавіка. Гэтым дакумэнтам Ізраіль праінфармаваў беларускі бок пра тое, што амбасада ў Менску застанецца адкрытай і працягне функцыянаваць у звычайным рэжыме.
Летась ізраільскі ўрад пастанавіў быў закрыць амбасаду ў Беларусі ў 2016 годзе.
Рашэньне скасаваць сваё дыпляматычнае прадстаўніцтва ў Беларусі ізраільскі ўрад, які абралі ў 2015 годзе, тлумачыў выключна фінансавымі праблемамі.
Аднак адзін зь лідэраў апазыцыі, кіраўнік партыі «Наш дом Ізраіль» Авігдор Лібэрман, які ў свой час ачольваў Міністэрства замежных спраў Ізраіля, назваў рашэньне аб закрыцьці амбасады ў Беларусі «дэманстрацыяй адкрытай пагарды ў дачыненьні да расейскамоўнай супольнасьці».
Ён дадаў, што ў Ізраілі жыве 130 тысяч выхадцаў зь Беларусі:
«Для іх закрыцьцё амбасады створыць сур’ёзныя цяжкасьці, як і для беларускіх габрэяў, якія хочуць рэпатрыявацца ў Ізраіль ці маюць патрэбу ў консульскіх паслугах».
Беларускі бок таксама зьбіраўся зачыняць сваю амбасаду ў Ізраілі, бо звычайная дыпляматычная практыка такая, што на закрыцьцё амбасады адказваюць аналягічным крокам.
Ізраіль ужо аднойчы — у 2003 годзе — закрываў амбасаду ў Беларусі. Менш як праз год тое рашэньне давялося выпраўляць.
