Лінкі ўнівэрсальнага доступу

Магілёўскія прадпрымальнікі дамагліся сустрэчы з чыноўнікамі


Сход прадпрымальнікаў на Віленскім рынку

Сход прадпрымальнікаў на Віленскім рынку

У Магілёўскім аблвыканкаме пагадзіліся сустрэцца зь мясцовымі прадпрымальнікамі. Бізнэсоўцы на сваім сёньняшнім сходзе сабралі больш за сотню подпісаў пад зваротам да старшыні аблвыканкаму Ўладзімера Даманеўскага, каб той, як гаворыцца ў лісьце да яго, «пахадайнічаў у разглядзе пытаньня працы прадпрымальнікаў па рэгуляваньні ўказу № 222 і мараторыя на праверкі кантрольных органаў на паўгода». Пра сустрэчу з чыноўнікамі прадпрымальнікі дамаўляліся праз тэлефон. Яна адбудзецца а 15 гадзіне.

На Віленскі рынак на трэці сход прыйшлі больш за сотню гандляроў таварамі расейскага легпраму. Гэтым разам за сходам назіралі людзі ў цывільным. Здымалі на відэа.

Грамада прадпрымальнікаў, якія спынілі працу, праводзіла сход насупраць палатак, якія працуюць

Грамада прадпрымальнікаў, якія спынілі працу, праводзіла сход насупраць палатак, якія працуюць

На пачатку сходу было заяўлена, што рыхтуецца зварот да гарадзкіх уладаў, каб сустрэцца з чыноўнікамі і патлумачыць ім сытуацыю, у якой апынуліся дробныя бізнэсоўцы.

«Панясем зварот адміністрацыі гораду. А калі гэтага ня ўдасца зрабіць, то паедзем у Менск на плошчу. Няхай ужо нешта вырашаюць, бо колькі можна цярпець? У нас няма за што сядзець дома. Няма сродкаў», — казалі прадпрымальнікі на сваім сходзе.

Зварот да ўладаў

Зварот да ўладаў

Калі зварот быў падрыхтаваны, пад ім актыўна пачалі падпісвацца. Адна з удзельніц сходу казала, што ўлада мусіць пачуць прадпрымальнікаў:

«Я ў гэта заўжды веру, бо пакінуць гэткую частку насельніцтва бяз працы, дзяржаву без падаткаў — дык уладзе ж нявыгадна. Улада сваімі ўказамі завяла сябе ў тупік і цяпер ня ведае, як прыгожа зрабіць крок назад і, самае галоўнае, прызнаць сваю неправату. Улада гэта разумее. Мы просім аб сустрэчы з чыноўнікамі, прыпыненьні 222 указу і мараторыі на праверкі», — казала бізнэсоўка.

Прадпрымальнікі падпісваюцца пад зваротам

Прадпрымальнікі падпісваюцца пад зваротам

Суразмоўніца выказала спадзеў, што абмеркаваньне сытуацыі зацікаўленымі бакамі дасьць плён і будзе знойдзены разумны кампраміс.

Пакуль прадпрымальнікі праводзілі сход, за ім назіралі іхныя калегі, якія выйшлі на свае працоўныя месцы, а таксама гандляры сэканд-хэндам на рынку.

На Віленскім рынку

На Віленскім рынку

XS
SM
MD
LG