Лінкі ўнівэрсальнага доступу

logo-print

Лукашэнка даручыў Генпракуратуры вярнуць грошы з Расеі ў Беларусь


Дэбіторская запазычанасьць за пастаўленую ў Расею беларускую прадукцыю з пачатку году ўзрасла больш як на 30%.

Агульная дэбіторская запазычанасьць за прадукцыю, пастаўленую беларускімі прадпрыемствамі ў Расею, ад пачатку году ўзрасла больш як на 30%. Генпракуратура Беларусі занялася гэтым пытаньнем па даручэньні Аляксандра Лукашэнкі.

Дарадца-пасланьнік пасольства Беларусі ў Расеі Ўладзімер Калтовіч паведаміў, што сытуацыя з дэбіторскай запазычанасьцю цесна зьвязаная з эканамічным становішчам у Расеі.

Колькасьць неплатаздольных расейскіх прадпрыемстваў толькі ў апрацоўчай прамысловасьці павялічылася ў 1,6 раза. Між тым Расея па-ранейшаму застаецца галоўным гандлёвым партнэрам Беларусі: на яе долю прыпадае 37% беларускага экспарту.

Сытуацыя з дэбіторскай запазычанасьцю і магчымасьці ўрэгуляваньня праблемных даўгоў абмяркоўваюцца цяпер на нарадзе з прадстаўнікамі суб’ектаў тавараправоднай сеткі беларускіх прадпрыемстваў у Маскве і Маскоўскай вобласьці. Гэтая нарада праходзіць 23–24 верасьня з ініцыятывы пасольства Беларусі ў Расеі.

Па даручэньні Аляксандра Лукашэнкі пытаньнем з расейскімі даўгамі занялася Генпракуратура Беларусі. Там заяўляюць, што казаць пра пералом сытуацыі рана.

Начальнік упраўленьня па наглядзе за выкананьнем заканадаўства і законнасьцю прававых актаў Генпракуратуры Беларусі Віктар Клімаў сказаў журналістам, што праблема зьнешняй дэбіторскай запазычанасьці мае сур’ёзны характар, бо наўпрост зьвязаная з папаўненьнем бюджэту і эканамічнай устойлівасьцю беларускіх прадпрыемстваў і арганізацыяў.

Пэўныя зрухі ў вырашэньні праблемы дэбіторскай запазычанасьці прадстаўнік Генпракуратуры зьвязаў з супрацоўніцтвам, якое ўдалося наладзіць з расейскімі калегамі.

Тым часам на нарадзе 23 верасьня Аляксандар Лукашэнка запатрабаваў актывізаваць працу па спагнаньні зьнешняй дэбіторскай запазычанасьці.

Ён заявіў, што ў гэты няпросты час бізуном для эканомікі і дзяржаўных фінансаў стала праблема невяртаньня дэбіторскай запазычанасьці:

Нашы прадпрыемствы пастаўляюць тавар, а грошы ці не атрымліваюць наогул, што падобна да злачынства, або атрымліваюць несвоечасова

«Гэта значыць, што нашы прадпрыемствы пастаўляюць тавар, а грошы ці не атрымліваюць наогул, што падобна да злачынства, або атрымліваюць несвоечасова, праз паўгода, а то і праз год ці гады. Гэта значыць, асобныя прадпрыемствы тавар аддалі, а грошай няма. Утвараецца дэбіторская запазычанасьць. Краіна, прадпрыемствы, калектывы недаатрымліваюць грашовыя сродкі. Калі гэта ўнутраная запазычанасьць, то мы хутка разьбяромся з гэтымі праблемамі, але самае небясьпечнае, што дэбіторская запазычанасьць — зьнешняя».

Паводле кіраўніка краіны, для вырашэньня гэтых пытаньняў былі прынятыя жорсткія рашэньні, асабліва ўнутры краіны.

«Апошні прыклад па алькаголі: хто не разьлічыўся за запазычанасьці да 1 верасьня, знайшлі свае месцы ў сьледчым ізалятары. І так будзе надалей. Мы не дазволім губіць дзяржаўныя і іншыя прадпрыемствы, якія займаюцца вытворчасьцю, рознага роду жульлю», — цытуе БелТА Лукашэнку.

Паказаць камэнтары

XS
SM
MD
LG