Францыя заклікала Расею не перашкаджаць мірным перамовам трохбаковай кантактнай групы і яе чатырох працоўных падгрупаў па ўрэгуляваньні сытуацыі на Данбасе.
Пра гэта пасол Францыі пры ААН Франсуа Дэлятр сказаў на пасяджэньні Рады бясьпекі ААН.
Дыплямат адзначыў, што ў лютым на пасяджэньні Рады бясьпекі ААН была прынятая рэзалюцыя № 2202 з заклікам да ўсіх бакоў канфлікту на ўсходзе Ўкраіны цалкам правесьці ў жыцьцё пакет захадаў Менскіх дамоўленасьцяў ад 12 лютага.
«У сувязі з гэтым мы шкадуем з-за крокаў расейскага боку, які 2 чэрвеня пакінуў залю перамоваў і спрабуе прымусіць успрымаць сэпаратыстаў як „законных“ партнэраў», — сказаў Дэлятр. Ён дадаў, што дзеля ўрэгуляваньня сытуацыі на Данбасе ўсе бакі павінны прытрымлівацца рэзалюцыі № 2202, перадае УНІАН.
Пасол дадаў, што Расея нясе адказнасьць за свае дзеяньні:
«Можна адзначыць, што ў небясьпецы апынулася дзейнасьць трохбаковай кантактнай групы. Мы цяпер бачым, што ёсьць жаданьне цалкам нівэляваць працу трохбаковай кантактнай групы, нягледзячы на тое, што яе дзейнасьць была падтрыманая ў рэзалюцыі № 2202».
Паводле францускага дыплямата, працэс рэалізацыі менскіх пагадненьняў — адзіны шлях, каб не дапусьціць узмацненьня новага гвалту на Данбасе.
«Мы заклікаем Расею не перашкаджаць працэсу перамоваў, выканаць свае абавязаньні, а таксама паўплываць на сэпаратыстаў», — адзначыў дыплямат.
Паводле Франсуа Дэлятра, важна настойваць на тым, каб Украіна таксама прытрымлівалася выкананьня менскіх пагадненьняў, у прыватнасьці ў пытаньні дэцэнтралізацыі.
2 чэрвеня пасяджэньне кантактнай групы па Ўкраіне ў Менску сарвалася. Крыніца, блізкая да ўкраінскай часткі кантактнай групы, абвінаваціла расейскі бок у зрыве пасяджэньня. «Прадстаўнік Расеі Азамат Кульмухаметаў пакінуў залю пасяджэньняў. Такім чынам, Расея фактычна сарвала пасяджэньне групы і паставіла пад рэвізію менскія дамоўленасьці», — цытуе крыніцу Інтэрфакс-Украіна.