Сярод іх няма кіраўніка прадстаўніцтва Беларусі пры АБСЭ, былога намесьніка міністра замежных спраў краіны Валерыя Варанецкага. Як паведамілі Свабодзе ў прэсавай службе зьнешнепалітычнага ведамства Беларусі, спадар Варанецкі, які адначасова зьяўляецца і амбасадарам Беларусі ў Аўстрыі, «цяпер знаходзіцца ў Вене».
Інфармацыю пра місію прадстаўнікоў краінаў АБСЭ ва Ўкраіне распаўсюдзіла місія ЗША пры гэтай міжнароднай арганізацыі:
«Гэта спосаб прадэманстраваць нашу падтрымку народу і ўраду Ўкраіны, — заявіў амбасадар ЗША пры АБСЭ Дэніел Бэер, — і пачуць зь першых вуснаў пра праблемы, зь якімі яны сутыкаюцца ў пляне рэагаваньня на гвалт, які распальваецца звонку, выкарыстаньня магчымасьці абраць новы парлямэнт і хутка ажыцьцявіць рэформы, здольныя прынесьці вынікі».
Напярэдадні адбылася сустрэча амбасадараў пры АБСЭ з кіраўніком Украіны Пятром Парашэнкам. Прадстаўнік ЗША павіншаваў прэзыдэнта Ўкраіны з прыняцьцем Вярхоўнай Радай антыкарупцыйнага заканадаўства. Амбасадары падтрымалі адзінства і тэрытарыяльную цэласнасьць Украіны. У сваю чаргу, Парашэнка падкрэсьліў неабходнасьць хуткіх дзеяньняў, каб забясьпечыць ахову і маніторынг міжнароднай мяжы паміж Украінай і Расеяй у адпаведнасьці зь Менскім пратаколам ад 5 верасьня.
Закранулі прадстаўнікі АБСЭ і тэму парлямэнцкіх выбараў ва Ўкраіне, якія пройдуць менш як праз тры тыдні. Кіраўніца доўгатэрміновай місіі БДІПЧ АБСЭ Тана дэ Сулуэта паведаміла, што ў выбарчай гонцы паўдзельнічаюць 3500 кандыдатаў з 29 партыяў, а Бюро дэмакратычных інстытутаў і правоў чалавека (БДІПЧ) мае 80 доўгатэрміновых назіральнікаў у краіне і плянуе ў дзень выбараў заангажаваць яшчэ 600 назіральнікаў. Парлямэнцкая асамблея АБСЭ таксама накіруе назіральнікаў на будучыя выбары.
