Лінкі ўнівэрсальнага доступу

Хворых на сьвіны грып лічыць ня будуць. Вакцыны атрымаюць міліцыянты


Беларускія мэдыкі спынілі ўлік выпадкаў пандэмічнага грыпу. "Неабходнасьці ў масавым абсьледаваньні насельніцтва і падліку выпадкаў пандэмічнага грыпу на дадзеным этапе ў Беларусі няма”, заявілі ў Міністэрстве аховы здароўя, патлумачыўшы гэта тым, што “ў адпаведнасьці з рэкамэндацыямі Ўсясьветнай арганізацыі аховы здароўя пры зьяўленьні істотнай колькасьці вострых рэспіраторна-вірусных захворваньняў на фоне лябараторна даказанага пранікненьня ў краіну вірусу пандэмічнага грыпу індывідуальны ўлік не патрэбны", паведамілі “Інтэрфаксу” ў Міністэрстве аховы здароўя Беларусі.


Міністэрства аховы здароўя Беларусі па-ранейшаму заяўляе, што сьвіны грып ў Беларусі з пачатку пэрыяду эпідэміялягічных назіраньняў лябараторна пацьверджаны ў 165 чалавек, зь якіх 139 за апошні час. Паводле стану на сярэдзіну лістапада ў Беларусі ад сьвінога грыпу памерлі 13 чалавек.

Міністэрства аховы здароўя зьбіраецца закупіць каля 1 мільёну дозаў вакцыны супраць сьвінога грыпу, каб вакцынаваць каля 500 тысячаў супрацоўнікаў так званых жыцьцёва важных службаў – мэдыкаў, супрацоўнікаў жыльлёва-камунальных службаў, шэрагу падразьдзяленьняў МУС і МНС.

Паводле Ўсясьветнай арганізацыі аховы здароўя, колькасьць сьмерцяў у выніку захворваньня на грып А/H1N1 толькі за тыдзень павялічылася на тысячу выпадкаў і складае 8768 чалавек.

Раней першы намесьнік міністра аховы здароўя Робэрт Часнойць сказаў, што на другую палову сьнежня прагназуецца рост захворваньняў на вірусныя інфэкцыі.

Ваша меркаваньне

Паказаць камэнтары

XS
SM
MD
LG