Лінкі ўнівэрсальнага доступу

“Малады фронт” пачаў кампанію “За беларускую мову!”


Зьміцер Дашкевіч зьбірае подпісы на Прывакзальнай плошчы.

Зьміцер Дашкевіч зьбірае подпісы на Прывакзальнай плошчы.

Актывісты “Маладога фронту” распачалі кампанію “За беларускую мову!” Яны зьбіраюць подпісы пад зваротам у дзяржаўныя інстытуты ўлады з патрабаваньнямі забясьпечыць беларускай мове фактычную роўнасьць з расейскай. У межах кампаніі будуць ладзіцца і іншыя імпрэзы.

У цэнтры Менску на Прывакзальнай плошчы некалькі актывістаў “Маладога фронту” прапаноўвалі мінакам паставіць свой подпіс і даць пашпартныя зьвесткі пад зваротам “За — беларускую мову!” Калі людзі даведваліся, зь якой мэтай іх спыняюць, то амаль усе пагаджаліся паставіць свой подпіс.

Старшаклясьнік: “Гэта цалкам справядліва. Калі б мяне бацькі, калі я быў маленькі, аддалі ў беларускамоўную школу, то я б пагадзіўся”.

Студэнт:“Я скончыў беларускамоўную школу ў Менскім раёне. Карыстаюся мовай зрэдку, калі карыстаюся кампутарам, каб яе не забываць. Я б хацеў, каб было больш беларускіх школ”.

Лідэр “Маладога фронту” Зьміцер Дашкевіч патлумачыў мэту акцыі:

“Мэта акцыі — паспрыяць беларусізацыі нашага грамадзтва, бо беларускай мове пагражае зьнікненьне. Кампанія „За — беларускую мову!“ у асноўным будзе адбывацца шляхам збору подпісаў. Мы плянуем сабраць ня менш за 50 тысяч, каб потым іх перадаць у міністэрствы адукацыі і культуры, Палату прадстаўнікоў, Савет міністраў, каб улада стварала беларускамоўныя школы, каб напачатку адкрыўся хаця б адзін беларускамоўны ўнівэрсытэт”.

Былі мінакі, якія спасылаліся на недахоп часу, але большасьць ахвотна падпісвалася пад зваротам.

Студэнтка: “Мы жывем у Беларусі, і нам усім неабходна беларуская мова, таму што гэта наша родная мова. Мы павінны на ёй размаўляць, а не па-расейску толькі з-за таго, што так заведзена”.

Карэспандэнтка: “А дзе вы вывучылі беларускую мову? З вамі бацькі размаўлялі?”

Студэнтка: “Не. Сама вывучыла. Хадзіла ў расейскую школу ў Глуску. Мае сябры размаўляюць па-расейску, але я магу і на той, і на той мове”.

Спадарыня: “Я з Гомельскай вобласьці. У нас у школе была беларуская мова, але не на тым узроўні, на якім хацелася б. У нас быў урок беларускай, але часта замянялі настаўнікі і не беларускай, а бібліятэкары і г.д. Беларуская мова лічыцца ў сучасных школах другасным прадметам. Насамрэч вучняў вучаць тым прадметам, якія больш неабходныя: матэматыка, фізыка, хімія і расейская мова”.

Студэнтка: “У мяне па-беларуску размаўляе ў асноўным бабуля. Я зь ёй — на „трасянцы“. Лічу, што шмат залежыць ад прэзыдэнта.
Усе сябры па-расейску гавораць, у інстытуце таксама. У нас на факультатыў па беларускай мове амаль ніхто ня ходзіць.
Калі прэзыдэнт не размаўляе, то й народ ня будзе размаўляць па-беларуску. Я зь беларускамоўнай школы. Я не магу размаўляць правільна па-беларуску. Ведаеце, чаму? Таму што патрэбныя навыкі, з часам забываецца. Я тры гады таму скончыла школу і забываю мову. Усе сябры па-расейску гавораць, у інстытуце таксама. У нас на факультатыў па беларускай мове амаль ніхто ня ходзіць”.

Спадарыня: “Калі-небудзь размаўляю. У мяне ёсьць некалькі сяброў, якія размаўляюць па-беларуску. У мяне быў расейскамоўны кляс. Але я самастойна вывучала мову, шмат чытала па-беларуску. Дзеці павінны самі выбіраць, на якой мове ім вучыцца і потым размаўляць. Ім павінны даваць мажлівасьць вывучаць сваю мову, а потым яны самі будуць вывучаць”.

Спадарыня: “Хацелася б ведаць беларускую мову. Ад нараджэньня чуеш толькі расейскую і на ёй жа й размаўляеш. Мы, беларусы, маем сваю мову, а самі яе й ня чуем. Цяжка будзе пераходзіць адразу на беларускую. Але дзецям трэба даваць беларускую”.

Студэнтка: “Я вывучаю беларускую мову ў пэдагагічным унівэрсытэце. Я выбрала прафэсію, якая мне падабаецца. Я фізык-матэматык. У мяне матэматыка на беларускай мове — матаналіз, альгебра і геамэтрыя. Я хачу, каб у школах дзеці вывучалі беларускую мову больш дакладна, каб школы былі з навучаньнем на беларускай мове”.

Паводле апошняга перапісу 75% грамадзянаў (у тым ліку 85% беларусаў) назвалі беларускую мову роднай, але яе ўжываньне ў дзяржаўных установах не адпавядае гэтым лічбам. Паводле ЮНЭСКО, беларускай мове пагражае зьнікненьне.

Наста Палажанка (справа)

Намесьніца Зьмітра Дашкевіча Наста Палажанка таксама зьбірала подпісы мінакоў:

“Насамрэч людзі ахвотна падпісваюцца, асабліва моладзь. Кажуць, што мелі б жаданьне размаўляць, калі б у свой час вучыліся па-беларуску. Таму спадзяемся на посьпех гэтай кампаніі”.

Паказаць камэнтары

XS
SM
MD
LG