Фаткограф. Ці праўда, што Пуцін ніколі не прапаноўваў уключыць Беларусь у склад Расеі?

Насамрэч

Аналягічную заяву Аляксандар Лукашэнка рабіў у кастрычніку 2018 года.

У жніўні 2002 году на перамовах з Лукашэнкам у Маскве Ўладзімір Пуцін прапанаваў Беларусі ўвайсьці ў склад Расейскай Фэдэрацыі альбо адным, альбо сям’ю суб’ектамі (шэсьць вобласьцяў плюс Менск).

Па вяртаньні ў Беларусь у менскім аэрапорце Аляксандар Лукашэнка заявіў: «Для беларусаў дадзеная фармулёўка будзе азначаць выбар — ці згодныя вы падзяліць Беларусь на 7 частак, уключыць іх у Расею на роўных правах з суб’ектамі Расейскай Фэдэрацыі. Гэта адназначна непрымальны варыянт для Беларусі, мы ніколі ня пойдзем на яго».

Празь некалькі тыдняў, на пачатку верасьня 2002-га, Пуцін яшчэ раз сфармуляваў сваю прапанову ў некалькіх варыянтах. Як паведамляў сайт Lenta.ru са спасылкай на Крэмль, першы намесьнік міністра замежных справаў РФ Валеры Лашчылін перадаў беларускаму боку пасланьне Пуціна, у якім прапаноўваліся — поўная інтэграцыя ў адзіную дзяржаву, наддзяржаўнае фармаваньне паводле мадэлі ЭЗ, а таксама праца па рэалізацыі ўжо існуючай дамовы аб стварэньні саюзнай дзяржавы Беларусі і Расеі.