Артур Фінькевіч

Добры дзень, спадар Артур! Вельмі прыемна адчуваць, што цяпер вы на волі! Пра ваша вызваленьне даведаўся сёньня з сайту Радыё Рацыя, а цяпер убачыў там таксама інфармацыю пра Вашу заўтрашнюю онлайн-канфэрэнцыю і адразу хаце запытаць у Вас адразу, што далі для Вашага асабістага разьвіцьця вось гэтыя амаль 2 гады зьняволеньня?

Што далі? Напэўна, крышачку па-іншаму, больш сур’ёзна, пачаў ставіцца да жыцьця і да розных з’яў. Безумоўна, зразумеў, што калі мы самі ня зьменімся, дык нічога ў гэтай краіне ня зьменім. Бо толькі зьмяніўшыся і ўсьвядоміўшы, што мы насамрэч лепш за дзейныя ўлады, мы здолеем штосьці зьмяніць.

Спадар Артур! Віншую асабіста Вас з вызваленьнем і увесь Малады Фронт, які за гэтыя 2 гады Вашай адсутнасьці калі і ня вельмі пашырыўся, то моцна пасталеў, з вяртаньнем аднаго трох колішніх самых гучных актывістаў (я маю на ўвазе Вас, Зьмітра Дашкевіча і Барыса Гарэцкага)! Спадар Артур, за час Вашай адсутнасьці большасьць Вашых паплечнікаў вельмі сур'ёзна заняліся асабістым разьвіцьцём і адукацыяй - Барыс Гарэцкі паступіў у Віленскі педагагічны унівэрсытэт, Наста Палажанка перайшла у лепшую школу і таксама зьбіраецца ў гэтым годзе паступаць у ВНУ... А што да Вас асабіста, ці зьбіраецеся Вы працягнуць адукацыю у якім-небудзь з унівэрсытэтаў, ці маеце Вы жаданьне заняцца ў жыцьці нейкай канкрэтнай справаю, якія у Вас пляны?

Дзякуй за віншаваньні. Я зьбіраюся працягваць вучобу ў ЭГУ. Разам са Зьміцерам Дашкевічам будзем аб'язжаць рэгіёны і адбудоўваць структуры Маладога Фронту.

Віншую цябе Артур з вызваленьнем!!!Вельмі рады, што яшчэ адзін лідэр Маладога Фронту на волі!!! Спадзяюся хутка пабачымся!!! Жыве Беларусь!!!

Дзякуй. Жыве!

Артут, с вызваленнем! У мяне такія пытанні: 1. Як ты лічаш, ці выпусцяцьна волю Казуліна? 2. Па якім сцэнары (маршруце) тэба святкаваць ДВ і я якім будзе ў нём удзел МФ? 3. Тваё сталенне да сп. Мілінкевіча і кангрэса АДС. Дзякуй.

Мне цяжка даваць нейкія прагнозы адносна дзеяньняў улады. Адносна Дня Волі -- я ня быў на аргкамітэце. Да Мілінкевіча стаўлюся як да лідара аб'яднанай апазыцыі.

З вызваленьнем! Артур, якія уражаньні ад стасункаў з сукамернікамі? Што гэта за людзі, як ставіліся да цябе?

Уражаньні абсалютна нармальныя, вельмі рады ўбачыць знаёмых, сяброў, блізкіх, маладафронтаўцаў”, якія цягам больш як месяц ладзілі акцыі штодзень у маю падтрымку з патрабаваньнем вызваленьня. З сукамернікамі стасункі былі нармальныя. Цудоўныя, як і на “Валадарцы” як і на “хіміі”, то бок людзі разумеюць, што чалавек сядзіць за тое, што ён выступае супраць дзейснага рэжыму. Ну а паколькі яны самі, у большасьці сваёй, супраць гэтага рэжыму – адпаведнае і стаўленьне.

Віншую з выхадам на волю! Як тваё адчуванне?

Дзякуй за віншаваньне! Адчуваньне абсалютна цудоўнае, як у кожнага нармальнага чалавека, які выйшаў з месцаў пазбаўленьня волі.

Artur, my z taboj nie znajomyja. Ale dzien suda nad taboj, dzien suda nad Zmitrom Daskievicam byli cornyja dni dla mianie i majich blizkich. Bierazycie siabie, budzcie macniejsymi,chitrejsymi, razumniejsymi. Treba scyra skazac u nas vajna. Inaks ja nie mahu nazvac toje, sto robicca. I jasce, jak my pieramozam, a tak budzie, budzcie pilnymi, nie dapuskajcie da ulady nie dobrych ludziej. I nizki paklon i pazadanni dobraha zdarouja vasym Backam.

Дзякуй вялізны за добрыя словы, за парады. Але тым ня меньш, што я, што Зьміцер як займаліся грамадзкай дзейнасьцю, так і будзем займацца. Вось плянуем на днях пачаць аб’езд рэгіёнаў, заняцца разбудаваньнем маладафронтаўскіх структураў. Але перш за ўсё – зьезьдзіць да Касі Салаўёвай у Полацк. Супраць дзяўчыны ўзбуджаныя тры крымінальныя справы. Учора ў яе ў хаце быў ператрус. Рэжым прыстасаваўся да практыкі, калі кагосьці выпускаюць – а ў кагосьці робяць ператрусы, на кагосьці ўзбуджаюць новыя крымінальныя справы. Толькі ў апошні час ўзбудзілі крымінальныя справа на Атаманчыка Кірылу і Андрэя Цянюту. Таксама апынуўся ў няволі Андрэй Кім. Асуджаны намесьнікгалоўнага рэдактара газэты “Згода” Зьдзьвіжкоў.

Ці ўдалося вам "навярнуць у сваю веру" каго-небудзь на хіміі? Ёсьць адтуль які-небудзь палітычны "улоў"?

А там з большага нікога ня трэба агітаваць, бо кантынгент на сам рэч, досыць апазыцыйны па сваёй спэцыфіцы. Чамусьці атрымліваецца так, што ў месцах зьняволеньня людзі, калі яны і не былі апазыцыйна настроеныя да дзеючай улады – робяцца імі. Безумоўна, сьвядомых сярод іх – адзінкі, але бывае, што і людзі з самой сыстэмы – напрыклад, кіраўнік заводу, трапляючы ў камэру сьледчага ізалятару, фактычна за некалькі месяцаў робіцца, можна сказаць, нармальным. Паўнавартасным апазыцыянэрам. Безумоўна, апазыцыянэрам у тых межах, у якіх гэта магчыма ў месцах пазбаўленьня волі.

Паважаны спадар Артур! Прыміце шчырыя віншаваньні з вызваленьнем! Вось даўно хацеў у Вас запытаць, на вашу думку, які прыклад, як маладафронтавец Вы можаце паказаць сучаснай беларускай моладзі, якая напрыклад вучыцца ва унівэрсэтэтах, інкнецца зарабляць нейкія грошы для сваё будучыні, развівацца?

Я навучаюся ў Эўрапэйскім гуманітарным унівэрсытэце. Зьміцер Дашкевіч – у Віленскім пэдагагічным унівэрсытэце. Грамадзкая дзейнасьць ніякім чынам не перашкаджае вучобе.

З вызваленьнем, спадар Артур! Пытаньне да Вас такое: як на вашу думку на беларуску палітычную сыітуацыю уплываюць падзеі духовага кшталту - нядаўняя экуменічная малітва за яднаньне кафэсіяў у чырвоным касьцёле, шматлікія пасты эвангельскіх вернікаў, прапаведніцкая справа?

Лічу, што гэта абсалютна цудоўныя і пазытыўныя зьявы, якія насамрэч уплываюць станоўча. “Малады Фронт” – хрысьціянска-дэмакратычная арганізацыя, таму нават па нашых праграмных дакумэнтах нашае стаўленьне павінна быць зразумелае.

Артур, скажыце, калі у Вашых сяброў узьнікне пытаньне выбіраць напрыклад паміж працай і вучобай альбо нястрыманым вулічным змаганьнем накшталт Крысьціны Шацікавай, якая, напэўна ужо і забылася на існаваньне сваі дзяцей, што вы будзеце раіць сваім сябрам?

Лепей гэта спрабаваць сумяшчаць, але лічу, што кожны чалавек мусіць сам вырашаць. Хаця адначасна я думаю, што знайсьці працу – праблема, але гэта вырашальная праблема. Як і з вучобай – вучыцца ніколі ня позна.

Артур, скажыце, на Ваш погляд ці павінен актывіст дэмакратычных сілаў у трэцім тысячагодзьдзі мець вышэйшую адукацыю і імкнуцца да ёе атрыманьня? Ці варта сучаснаму беларусу наагул рупіцца пра самаудасканаленьне і што Вы для гэтага робіце?

Я перакананы, што вышэйшая адукацыя неабходная кожнаму чалавеку. Безумоўна, кожнаму беларусу варта ўдасканальвацца, разьвівацца. Асабіста я за апошні час зразумеў, што трэба ісьці да Бога, і рабіць гэта не раз на тыдзень, ставіўшы сьвечкі ў царкве, а – усёй душой, усім сэрцам.

Спадар Артур, паводзінамі апошніх 2-х год Вы яскрава паказалі сваю, мягка кажучы, непрыхільнасьць да царквы. Цяпер, пасьля Вашага нечаканага вызваленьня, ці зьбіраецеся Вы зьмяніць сваё такое адмоўнае стаўленьне?

Гэта асабістае пытаньне, але я на яго адкажу. Кепскага стаўленьня да царквы ў мяне ніколі не было. За два гады – як і любы чалавек, які робіць памылкі, -- я гэтыя памылкі рабіў, я гэта разумею. Таму я гэта ўсьведамляю, і зараз, дзякуючы Боскай дапамозе, спадзяюся, такіх памылак ня будзе.

Добры дзень, паважаны Артур. Скажыце, калі ласка. 1. Хто для Вас узоры ў палітыцы, жыцьці? 2. Хто зрабіў на Вас найбольшы ўплыў? Я маю на увазе і жывых людзей і асобаў мінулага. 3. Што Вы чытаеце, якую музыку слухаеце? 4. Каго з беларускіх пісьменнікаў Вы любіце чытаць.

1. Узор для мяне ў палітыцы – напэўна. Павал Севярынец, як шчыры чалавек і цудоўны палітычны дзеяч. Таксама ў нас цудоўны “адзіны кандыдат” Аляксандар Мілінкевіч. І зараз, апроч яго, сярод нацыянальных сілаў няма тых асобаў, якія б маглі фактычна аспрэчваць гэты статус. 2. Найбольшы ўплыў – напэўна, маладафронтаўцы, сябры, блізкія. 3. Музыку слухаю абсалютна ўсю, паколькі за апошнія два гады быў рады любой “музычнай прадукцыі”, бо на дзяржаўнай “радыёкропцы” вельмі мала музыкі, у асноўным ідзе голас дыктара пра тое, як у нас усё цудоўна. І з кожным днём робіцца жыць усё лепш і лепш. 4. Апошняе, што чытаў – кніга Арлова “Сланы Ганібала”.

Артур, як Вы ставіцеся да ўдзелу жанчын у вулічнай барацьбе?

Гэта пытаньне, напэўна, да саміх жанчын. Калі жанчына лічыць патрэбным выходзіць на вуліцы – значыць, так і трэба. Напрыклад, у украіне выходзілі на вуліцы цэлымі сем’ямі – жонкі, дзеці, мужы.

Артур, віншую з выхадам на волю! 1) Як вы думаеце, ці вызваліць рэжым астатніх палітычных вязьняў? Калі так, то калі? 2) Дзень Волі 2008 - свята ці акцыя пратэсту?

Я не магу прадказваць дзеяньні ўладаў, але магу сказаць, што мы мусім змагацца за вызваленьне палітвязьняў. І я, і Зьміцер будзем рабіць усё магчымае, каб іншыя палітвязьні апынуліся на волі. 2. 25 сакавіка – гэта сьвята для кожнага сьвядомага беларуса. Пытаньне ў тым, як яго адзначаць. Звычайна традыцыя – масавыя вулічныя мерапрыемствы, і думаю, тут ніякіх адкрыцьцяў я не зраблю.

Прывітаньне, Артур! Перш за ўсё, віншую цябе са СВАБОДАЙ! У якім накірунку, на тваю думку, зараз варта разьвіваць дзейнасьць МФ? Якія мэтады барацьбы ты лічыш найбольш эфэктыўнымі?

Думаю, што ў бліжэйшы час мы са Зьміцерам Дашкевічам аб’едзем усе нашыя рэгіянальныя структуры, будзем размаўляць з моладзьдзю. Думаем правесьці зьезд, падаць у Мінюст дакумэнты на рэгістрацыю. Безумоўна, гэта ўдзел у вулічных мерапрыемствах, у палітычных акцыях. У нас ёсьць кандыдаты на парляманцкія выбары. Будзем займацца культуніцкай дзейнасьцю: праводзіць шоў беларушчыны, дзі-джэйскія курсы і іншыя мерапрыемствы.

Добры дзень. Вельмі рады за тваё вызваленьне. Зянон Станіслававіч, калі адчуў небясьпеку, зьехаў у эміграцыю. Цяпер ён сядзіць за мяжой і вельмі любіць крытыкаваць апазыцыйных дзеячаў. Калі небясьпека навісла над табой, ты застаўся. Крыху правакацыйнае пытаньне, як ты ацэньваеш учынак айца БНФ, які ўцёк і пакінуў народ сам насам з уладамі? Калі б ён застаўся, нешта зьмянілася б?

Лічу, што ніводзін чалавек ня мае ніякага маральнага права асуджаць чалавека за тое, што ён у такой сытуацыі зьехаў. Ведаю. Што зараз зьехаў Аляксей Шыдлоўскі (яму мае прывітаньні і словы падтрымкі). Але тым жа самым я не кажу, што варта зьязжаць за мяжу пры нейкіх сытуацыях, калі нешта пагражае. Хтосьці зьязжае, хтосьці застаецца. Трэба проста вызначацца, чаго ты хочаш ад гэтага жыцьця, і на якія ахвяры ты гатовы пайсьці.

Рады Твайму вызваленьню, Артур. Урэшце мы абавязкова пераможам акупацыйны рэжым! Як ты лічыш, што карыснага зрабіў для беларускай справы Мілінкевіч?

Мілінкевіч – лідэр аб’яднаных дэмакратычных сілаў для мяне і для кожнага нацыянальна сьвядомага беларуса.

Якое маеш стаўленьне да Пазьняка? Ці не жадаеш супрацы з Фронтам Пазьняка?

Я абсалютна цудоўна стаўлюся да Зянона Станіслававіча Пазьняка, гэта чалавек, які , у любым выпадку, застанецца ў гісторыі Беларусі. Але на дадзены момант ён за мяжой. Наконт супрацоўніцтва з Фронтам Пазьняка – яны так ці інакш прымаюць удзел у масавых мерапрыемствах, ці ладзяць нешта сваё, але супраца нейкая ідзе.