У Стакгольме пачаўся Нобэлеўскі банкет
На ўрачыстым банкеце ў Блакітнай залі Стакгольмскай ратушы Сьвятлана Алексіевіч, як і іншыя Нобэлеўскія ляўрэаты, сядзіць разам з членамі каралеўскай сям’і і ўплывовымі палітыкамі.
Зьлева ад Алексіевіч — Свантэ Лінквіст, рыксмаршал (кіраўнік прыдворнага ведамства) Швэцыі, а па правую руку ад пісьменьніцы — Міхаэль Сольман, былы выканаўчы дырэктар Нобэлеўскага фонду.
Месца першага беларускага нобэлеўскага ляўрэата — за чатыры крэслы ад прынцэсы Сафіі і за сем крэслаў ад караля Швэцыі Карла XVI Густава (ён сядзіць па іншы бок стала). А насупраць Сьвятланы Алексіевіч — міністар ў справах навукі Канады Крысьцін Дункан, прэм’ер-міністар Швэцыі Стэфан Лёвэн і сьпікер швэдскага парлямэнту Урбан Алін.
Прадстаўленьне Нобэлеўскай ляўрэаткі: «Сьвятлана Алексіевіч узгадаваная ў культуры смутку краіны, дзе быў забіты кожны чацьверты»
Швэдзкі пісьменьнік Пэр Вэстбэрг, старшыня Нобэлеўскага камітэту па літаратуры, выступіў з прамовай на ўручэньні Нобэлеўскай прэміі Сьвятлане Алексіевіч.
Шаноўнае спадарства, Вашы Каралеўскія Вялікасьці, паважаныя нобэлеўскія ляўрэаты!
Альфрэд Нобэль хацеў, каб гэтую прэмію атрымлівала асоба, якая стварыла найбольш выбітны твор ідэалістычнай скіраванасьці. Сьвятлана Алексіевіч выканала гэтае патрабаваньне. «Галасы Ўтопіі» — яе сюіта зь пяці кнігаў, якія апісваюць катастрофы 20-га стагодзьдзя — гэта літаратурны і маральны шэдэўр Алексіевіч. Складаньне мапы мэнтальнай гісторыі савецкага грамадзяніна, якую яна зьвязвае з магіламі, праліцьцём крыві і бясконцым дыялёгам паміж катамі і ахвярамі, якія намагаюцца схаваць як мага больш. Яна кажа, што гэтыя творы — пра здушаны крык Расеі, пра мінулае, якое не павінна вярнуцца, пра непрымальны цяперашні час і пра будучыню, якая не дае надзеі. Як стэнограф у высокім судзе, яна пералічвае несправядлівасьці, якія напаткалі непадрыхтаваных і безабаронных. Тут словы тысячаў сьведкаў першы і адзіны раз. Безь яе яны ніколі б не пабачылі сьвятла. Яна шукае момант, які патрасае асобу да самай сутнасьці. Як у галасах Чарнобылю, калі мэдсястра папярэджвае жанчыну, што яе каханы ператварыўся ў рэактар, што ён ужо не чалавек, але жанчына ігнаруе папярэджаньне, і радыяцыя ад цела мужчыны забівае дзіця, якое яна носіць у сабе. Кніга робіцца папярэджаньнем пра тое, як мінулае выпраменьваньне дзесяцігодзьдзямі дыктуе нашыя жыцьці, нашую мараль. У кнізе «У вайны не жаночае аблічча» Алексіевіч апытвае пяцьсот зь незьлічоных жанчын, якія служылі ў Чырвонай арміі. Яны расказваюць, як немцы з акопаў паказвалі адрэзаныя ногі палонных, пра маці, якая ўтапіла сваё дзіця, каб ня выдаць сваю вёску, і пра тое, як жанчыны рабілі бігудзі з сасновых шышак. А потым дома на іх глядзелі як на салдацкіх курваў і ад іх адчужаліся іх сем’і. Мужчыны былі героямі, а жанчынам не давалі мэдалёў. Алексіевіч адкрывае аблічча зла працэсам праўды, дзе полымя спальвае хлусьню, і мовай, якая паміж радкоў перадае маўчаньне болю. Яна чакае пакуль галасы не паселяцца ў ёй, набываючы рэзкасьць. Гэта робіць яе найбольш чульлівай сярод сучасных гісторыкаў і вынаходнікам жанру. Сваёй сухой празаічнасьцю, сваімі намаганьнямі трымаць вочы расплюшчанымі, а не запоўненымі сьлязьмі, яна турбуе нас, сваіх чытачоў, асабліва сёлета, у год патоку ўцекачоў, калі яе гісторыі ўпартасьці і мужнасьці бездапаможных больш актуальныя, чым калі-кольвечы. Узгадаваўшыся ў культуры смутку, больш сканцэнтраванай каля лясоў Беларусі, — краіны, дзе быў забіты кожны чацьверты — яна мае любоў да маленькіх людзей, а не да вялікіх ідэяў. Вусны аповед гэта крыніца літаратуры. З дапамогай памяці людзі захоўваюць абрысы існаваньня. Даць гісторыі аблічча і зрабіць людзей бачнымі аднаго за другім — гэта велікадушнае дзеяньне, якое дакумэнталістыка пакідае ў спадчыну будучыні, а таксама непараўнальнае мастацкае дасягненьне. Выкарыстоўваючы як сваю таемную зброю апытаньні і слуханьне, Алексіевіч пранікае ў пачуцьці таго дадатковага, на што не зьвяртала ўвагі гісторыя. Яна знаходзіць каханьне і сьмерць, прагу ўлады і нечаканую салідарнасьць. Яна называе сябе гісторыкам душы. Прадмет яе вывучэньня — чалавечыя таямніцы. Алексіевіч аб’ядноўвае дакладнасьць гісторыка з эмпатыяй паэта ў плачы, у якім адгукаецца рэхам увесь магчымы досьвед. Яна дэтэктар хлусьні і невычэрпная крыніца ведаў пра паслухмянасьць як праклён і прапаганду як спакусу — карацей, пра стан чалавека. Бо калі яна нас напружвае, ёсьць толькі адно выйсьце — пачаць любіць людзей, разумець іх з дапамогай любові.
(па-расейску) Шаноўная Сьвятлана Алексіевіч, Швэдзкая акадэмія віншуе Вас і просіць прыняць зараз сёлетнюю Нобэлеўскую прэмію ў галіне літаратуры з рук Яго Вялікасьці Караля.
Першыя словы Нобэлеўскай ляўрэаткі Сьвятланы Алексіевіч пасьля атрыманьня прэміі
Запіс жывой відэтрансьляцыі цырымоніі
Удзельнікі ўрачыстай цырымоніі стоячы выконваюць нацыянальны гімн Швэцыі.
Нобэлеўскай прэміяй па эканоміцы ўганараваны англа-амэрыканскі эканаміст Ангус Дытан за аналітычныя дасьледаваньні ў галіне «спажываньня, беднасьці і дабрабыту».
Вядоўца цырымоніі прадстаўляе Нобэлеўскую ляўрэатку па літататуры Сьвятлану Алексіевіч:
«Праз словы Алексіевіч перадае цішыню болі. Яна спрабуе трымаць свае вочы шырока адкрытымі, а не запоўненымі сьлязьмі... Яна вырасла ў краіне, дзе кожны чацьвёрты быў забіты на вайне, таму яна любіць маленькіх людзей, а не вялікія ідэі.
Алесіевіч глыбока пранікае ў пачуцьці сьведкаў гісторыі. Яна называе сябе гісторыкам душы.
Яна зьяўляецца і дэтэктарам хлусьні, і невычарпальнай крыніцай ведаў. Яна пераконвае нас — трэба пачынаць любіць людзей...»
Уручаецца Нобэлеўская прэмія па мэдыцыне і фізыялёгіі. Ляўрэаты – ірляндзец Уільям Кэмбэл і японец Сатосі Умура за адкрыцьці ў галіне барацьбы з паразытамі, а таксама кітаянка Юю Ту за адкрыцьці ў галіне барацьбы з малярыяй.
Сьвятлана Алексіевіч перад пачаткам цырымоніі. Фота Стэфана Эрыксана.
Нобэлеўская прэмія па фізыцы уручаецца за нэйтрына, кажа старшыня Нобэлеўскага камітэту Касі Кулман Файв.
На сцэну ўздымаюцца ляўрэаты прэміі па фізыцы японец Такаакі Кадзіта і канадзец Артур Макдональд за «адкрыцьцё асцыляцыі нэйтрына, што даказвае, што ў іх ёсьць маса». Узнагароду яны атрымліваюць з рук караля Швэцыі.
Прадстаўляюць ляўрэатаў прэміі па хіміі, трыё навукоўцаў з Швэцыі і ЗША: швэда Томаса Ліндаля, Пола Модрыча з ЗША і амэрыканца турэцкага паходжаньня Азіза Санджара. Прэмію яны атрымліваюць за дасьледаваньні працэсаў рэпарацыі пашкоджанай ДНК.