Каардынатар аргкамітэту па стварэньні партыі «Беларуская хрысьціянская дэмакратыя» Андрэй Гайдукоў мае зьявіцца ў міліцыю сёньня да 14-й гадзіны. Якое адміністрацыйнае правапарушэньне ён мог зьдзейсьніць, хлопец не ўяўляе.
16 лістапада Андрэй праводзіў у Наваполацку пікет, прысьвечаны зьніклым палітыкам. Але за гэты ўчынак яго ўжо асудзілі 30 лістапада. Суд пастанавіў прызнаць Андрэя Гайдукова вінаватым на падставе часткі 3 артыкулу 23.34 КаАП і пакараць яго штрафам у памеры 45 базавых велічынь (8,1 млн рублёў). Справу разглядала судзьдзя Алёна Верташонак. Сьведкамі былі прадстаўнік наваполацкага гарвыканкаму Ўладзімер Бяляеў і міліцыянт Аляксандар Барэткін.
Андрэй Гайдукоў спрабуе абскардзіць пастанову Наваполацкага суду, разгляд ягонай касацыйнай скаргі ў Віцебскім абласным судзе прызначаны на 13 студзеня.
«Падставаў для цяперашняга выкліку ў міліцыю я нават не ўяўляю. Палітычных акцыяў не было. Я хіба што ўдзельнічаў у кампаніі „За якасную мэдыцыну“, якую абвясьціў і праводзіць аргкамітэт па стварэньні партыі „Беларуская хрысьціянская дэмакратыя“. Абсалютна ніякіх правінаў я за сабой не адчуваю», — сказаў Андрэй Гайдукоў Свабодзе.