Лінкі ўнівэрсальнага доступу

Пэнсіянэрку Ніну Багінскую, якая спаліла савецкі сьцяг каля КДБ, вызвалілі


Ніна Багінская
Ніна Багінская

Калі актывістка патлумачыла спэцслужбам, навошта спаліла сьцяг, супрацоўнікі КДБ выклікалі да яе псыхіятра.

Грамадзкую актывістку Ніну Багінскую, якую былі затрымалі ўвечары 1 жніўня пасьля спаленьня чырвонага сьцягу каля будынку КДБ, ў ноч на 2 жніўня вызвалілі з Цэнтральнага РУУС, склаўшы на яе пратакол.

Пра гэта Ніна Багінская паведаміла карэспандэнту Свабоды.

«У КДБ было ўсё вельмі проста: мяне затрымалі, пагаварылі. Я патлумачыла, чаму спаліла чырвоны сьцяг зь сярпом і молатам — бо гэта сьцяг, пад якім забівалі мільёны людзей, рабілі генацыд беларусаў. І што 1 жніўня правяла сваю акцыю, таксама патлумачыла — бо ў гэты дзень ў 1937 годзе тут, ў дворыку турмы „амэрыканкі“ палілі кнігі нашых беларускіх пісьменьнікаў і паэтаў, якія мы ужо ніколі не прачытаем. Мяне слухалі і выклікалі для размовы са мной псыхіятра. Той са мной пагаварыў, і пасьля я чула, як ён сказаў ім: „Тут усё нармальна“.

Тады мяне адвезьлі ў Цэнтральны РУУС, склалі пратакол аб маіх дзеяньнях і пакінулі сабе бутэлечку з газай, якім я змачыла сьцяг, каб добра гарэла. Відаць, пакіінулі, як рэчавы доказ.

Але мне нічога не сказалі — будуць заводзіць справу ці не».

Для «Свабоды Ніна Багінская патлумачыла свой учынак:

«Не зьбіраюся цярпець той прамаскоўскі вэрхал, які творыцца ў Беларусі. У Менску стаяць помнікі Леніну і Калініну, гэтым забойцам беларускага народу, а помніка Каліноўскаму дагэтуль паставіць ня можам. Я хацела паказаць прыклад таго, што са злом трэба змагацца, а не патураць яму».

Пэнсіянэрка Ніна Багінская вядомая актыўным удзелам ў пратэстных акцыях, на якіх яе неаднаразова затрамлівалі міліцыянты. У тым ліку Ніна Багінская адна выходзіла зь бел-чырвона-белым сьцягам, які лічыць сапраўдным дзяржаўным сьцягам Беларусі.

Паводле Ніны Багінскай, у КДБ і Цэнтральным РУУС Менска зь ёй абыходзіліся карэктна.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG