Намесьніца начальніка Ўпраўленьня арганізацыі мэдычнай дапамогі Міністэрства аховы здароўя
Людміла Жылевіч у аўторак на прэсавай канфэрэнцыі на пытаньне, колькі чалавек захварэла на грып і колькі памерла, адказала так:
“Сытуацыя па сьмяротнасьці не перавышае парог мінулага году. На сёньняшні дзень зьмяншаецца і цяжкасьць захворваньня, зьмяншаецца колькасьць хворых, якія патрабуюць больш інтэнсіўнай тэрапіі. А тое, што высокі ўзровень захворваньняў, – гэта праблема ўсяго сьвету”.
Людміла Жылевіч кажа, што штогод у Беларусі адзначаецца эпідэміялягічны ўздым, а ў сувязі з надвор'ем ён сёлета пачаўся раней. Але мэдыкі да яго гатовыя. А імкненьня да “смажаных” фактаў у журналістаў наагул не павінна быць. Канкрэтныя ж лічбы чыноўніца Мінздраву назваць адмовілася:
“Я за гэты час, прагледзеўшы інтэрнэт і ўсё астатняе, была зьдзіўленая, адкуль людзі бяруць гэтыя лічбы. Я ня буду камэнтаваць чуткі і ўсё, што не афіцыйна выдадзена”.
Сёньня
лекарка аднаго са сталічных шпіталяў, якая не называе свайго імя, распавяла Радыё Свабода:
“Вось сёньня яшчэ адно аддзяленьне – ЛОР-аддзяленьне перапрафілюем і пераводзім пад пульманалёгію. Задыхаемся... І так было дзьве пульманалёгіі, наша аддзяленьне трэцяе, і яшчэ адно пад пульманалёгію пераводзіцца. І нэўралёгію, кажуць, таксама перавядуць пад пульманалёгію”.
Павязку абсалютна лёгка можна зрабіць самому з марлі. Праз кожныя 4 гадзіны яе трэба мыць і высушваць
: “А наагул хворыя цяжкія ў шпіталі?”
“Вельмі, вельмі, вельмі...”
На пытаньні, чаму адбываюцца перабоі зь лекамі, у аптэках няма арпітолу ды іншых папулярных прэпаратаў, няма марлевых павязак, намесьніца начальніка Ўпраўленьня арганізацыі мэдычнай дапамогі Людміла Жылевіч адказала:
“Павязку абсалютна лёгка можна зрабіць самому з марлі. Праз кожныя 4 гадзіны яе трэба мыць і высушваць. Арпітол – гэта прэпарат, які мае імунамадэлюючыя ўласьцівасьці, такія ж самыя, як у эхінацэі, элеўтэракоку, іншых адаптагенаў”.
Паводле інфармацыі Менскага гарадзкога цэнтру гігіены і эпідэміялёгіі, за апошнія суткі толькі ў сталіцы захварэлі на грып і вострыя рэспіраторна-вірусныя інфэкцыі больш за 14 тысяч чалавек. 114 чалавек шпіталізаваныя зь віруснымі інфэкцыямі, 10 – з грыпам. Абвяшчаць эпідэмію пакуль не плянуецца. А вакацыі ў школьнікаў проста працягнулі^ гэта, маўляў, не карантын. Дыягназ “сьвіны грып” пацьвердзіўся ў 59 чалавек. Што да сытуацыі па краіне ў цэлым, супрацоўніца прэсавай службы Міністэрства аховы здароўя
Раіса Чудук кажа:
“Уся інфармацыя разьмешчаная ў панядзелак увечары на сайце. Новай інфармацыі я не атрымлівала”.
Карэспандэнтка: “І ніякіх новых дадзеных?”
“На гэты час пакуль яшчэ няма. Толькі тое, што мы разьмясьцілі на сайце ўчора”.
Тым часам студэнтаў шостага курсу Менскага мэдунівэрсытэту зьнялі з заняткаў і накіравалі дапамагаць участковым лекарам у паліклінікі і шпіталі гораду.