Аляксандар Лукашэнка падпісаў 19 верасьня ўказ №337, які дазволіў індывідуальным прадпрымальнікам весьці шэраг відаў дзейнасьці без рэгістрацыі, але з выплатай адзінага падатку.
Указ набудзе сілу празь месяц і мае «легалізаваць» тыя віды дзейнасьці, якія фізычныя асобы «фактычна ажыцьцяўляюць у хатніх умовах».
У сьпіс такіх відаў дзейнасьці ўвайшлі:
— абслугоўваньне кампутараў і пэрыфэрыі;
— адстройваньне;
— настройка музычных інструмэнтаў;
— пагрузка грузаў;
— шыцьцё адзеньня;
— пілаваньне дроваў;
— прадастаўленьне месца для кароткатэрміновага пражываньня фізычных асобаў;
— рамонт мэблі, гадзіньнікаў, абутку;
— распрацоўваньне вэб-сайтаў;
— распрацоўваньне дызайну памяшканьняў, мэблі, адзеньня і абутку, графічны дызайн;
— рэалізацыя самастойна вырабленых кулінарных вырабаў;
— цырульніцкія і касмэтычныя паслугі.
Як тлумачыць Свабодзе старшыня прэзыдыюму Рэспубліканскай канфэдэрацыі прадпрымальніцва і Менскага сталічнага саюзу прадпрымальнікаў Уладзімер Карагін, гэты ўказ — толькі частка дэкрэту аб разьвіцьці прадпрымальніцтва, які рыхтаваўся з удзелам канфэдэрацыі, адзін зь дзясятка ўказаў сумарным аб’ёмам у 1300 старонак, якія, як мяркуецца, Лукашэнка падпіша да 1 кастрычніка.
«Прадпрымальнікам можна будзе ў якасьці як ІП, так і фізычнай асобы адкрыць краму, аказваць паслугі практычна гэтак жа, як гэта працуе ў аграэкатурызьме. Гэты рэжым будзе дзейнічаць 10 гадоў, так цяпер плянуецца.
Гэта робіцца, каб насыціць паслугамі гандаль і падтрымаць самазанятасьць людзей у сельскай мясцовасьці, у населеных пунктах да 2000 чалавек. Будзе скарочаны сьпіс санітарных і ліцэнзійных патрабаваньняў, мінімізаваная да сымбалічнай плата, як у рамесьнікаў і ў агра- і экатурызме.
Будзе стварацца новы від бізнэс-актыўнасьці. Гэта, безумоўна, добрая падтрымка бізнэс-ініцыятывы, зьяўленьня людзей са стартавым капіталам і прадастаўленьня паслуг людзям у сельскай мясцовасьці».
