Інстытут ядзернай і радыяцыйнай бясьпекі Францыі (IRSN) зафіксаваў радыяактыўнае воблака над Эўропай. Гэта можа сьведчыць пра аварыю з уцечкай рутэнію-106 на ядзерным аб’екце ў Расеі ці Казахстане ў канцы верасьня.
Раней радыяактыўнае воблака над Эўропай зафіксавалі навукоўцы зь Нямеччыны і таксама называлі ў якасьці месца верагоднай уцечкі поўдзень Уралу.
Дзяжурны эколяг Белгідрамэтэацэнтру паведаміў Свабодзе, што апошнімі тыднямі зьмены ў радыяактыўным фоне паветра не заўважаны.
Замеры рутэнію-106 праводзяцца раз на 10 дзён. За вынікамі апошняга замеру элемэнту карэспандэнту Свабоды параілі зьвярнуцца ў лябараторыю.
Максымальная канцэнтрацыя радыяактыўнага рэчыва ў атмасфэры над Эўропай была зафіксавана ў пачатку кастрычніка, але з 6 кастрычніка яна лічбы рэзка пайшлі на спад. Цяпер здароўю людзей у Эўропе нічога не пагражае. Францускія навукоўцы падкрэсьліваюць, што калі б аналягічная ўцечка адбылася ў Францыі, уладам давялося б эвакуяваць людзей у радыюсе некалькіх кілямэтраў ад месца выкіду.
