Экс-старшыня Менгарвыканкаму Мікалай Ладуцька ад 8 чэрвеня прызначаны дырэктарам «Мотавела».
Гэтую інфармацыю карэспандэнту Свабоды пацьвердзілі на прадпрыемстве.
Аляксандар Лукашэнка вызваліў Мікалая Ладуцьку ад пасады кіраўніка Менску ў лістападзе 2014 году.
Паводле СМІ, уладальнік «Мотавела» і шклозаводу «Ялізава» Аляксандар Мураўёў затрыманы. Як распавялі kp.by знаёмыя бізнэсмэна, увечары ў сераду, 3 чэрвеня, Аляксандар Мураўёў зьбіраўся ляцець у Вену, аднак у аэрапорце на яго надзелі кайданкі.
У Сьледчым камітэце карэспандэнту Свабоды не пацьвердзілі інфармацыю пра затрыманьне Аляксандра Мураўёва.
Падчас прэс-канфэрэнцыі ў студзені гэтага году Аляксандар Лукашэнка ня выключыў вяртаньня Натальлі Пяткевіч, Мікалая Ладуцькі і Анатоля Тозіка на пасады ў дзяржапараце.
«Што тычыцца Ладуцькі, — падбяром адпаведныя пасады», — сказаў Лукашэнка.
Ладуцьку падабралі пасаду амаль праз паўгода.
