Лінкі ўнівэрсальнага доступу

logo-print

Караткевіч пра свой удзел у выбарчай кампаніі: «Чаканьне дастала! Ужо час дзейнічаць»


Тацяна Караткевіч

Тацяна Караткевіч

Старшыня кампаніі «Гавары праўду» Тацяна Караткевіч заявіла, што будзе вылучацца кандыдатам у дэпутаты.

У інтэрвію карэспандэнту Свабоды яна патлумачыла прычыны такога рашэньня і выказалася наконт пэрспэктываў трапіць у Палату прадстаўнікоў.

— Чаму я вырашыла балятавацца? Гэта палітыка, і ў ёй трэба ўдзельнічаць. Нельга спыняцца, трэба працягваць. Я асабіста, наша праграма і «Гавары праўду» атрымалі вотум даверу ад людзей. І трэба намагацца, каб часткова ці цалкам наша праграма была рэалізаваная. Мы бачым сёньня, што гэта магчыма праз актыўны ўдзел у палітычнай кампаніі. Такой, як парлямэнцкая.

— Як вы ацэньваеце свае шанцы перамагчы, а таксама шанцы Андрэя Дзьмітрыева і іншых вашых паплечнікаў з «Гавары праўду»?

— У мяне пра гэта часта пытаюць. Я кажу — 50 на 50. Але мы будзем працаваць на тое, каб за намі была электаральная перамога.

— А якім чынам вы будзеце дасягаць гэтай перамогі?

— Мы цяпер рыхтуем нашу каманду кандыдатаў, якія будуць выступаць з адзінай праграмай. Мы будзем актыўна працаваць з выбаршчыкамі, як гэта вядзецца ў «Гавары праўду», перад выбарамі, падчас і пасьля іх. Сёньня электаральнай перамогі ты можаш дасягнуць, калі ты пераканаеш сваіх выбарцаў галасаваць за сябе, калі ты іх пераканаеш, што ідзеш прадстаўляць у парлямэнт іх галасы, што ў цябе ёсьць альтэрнатыўныя рашэньні для эканомікі, мэдыцыны, адукацыі. І тады яны даверацца. Мы кажам: каб ажывіць нашу палітычную сыстэму, трэба прадстаўляць альтэрнатыву і трэба актыўна ўдзельнічаць.

— То бок з тым, як лічаць галасы, праблемы няма?

— Праблема ёсьць, але адзін з мэханізмаў яе вырашэньня — гэта актыўны ўдзел, барацьба. Мы пастаянна кажам пра тыя праблемы, якія ёсьць у заканадаўстве і ў правапрымяняльнай практыцы. Але прапановы па зьмене выбарчага заканадаўства хутчэй прасоўваюцца тады, калі ты актыўна карыстаесься гэтым інструмэнтам. Па-другое, няма як чакаць! Як у Вольскага — чаканьне дастала. Ужо час дзейнічаць.

Мы лічым, што варта змагацца за перамогу. Галоўнае, каб гэты працэс скончыўся перамогай. Я лічу, што ня важна, хто з дэмакратаў пройдзе ў парлямэнт. Важна, каб гэтыя людзі былі і паказалі, што гэты шлях магчымы.

— Якія асноўныя мэты вашай перадвыбарчай праграмы?

— Мы будзем працягваць адстойваць лібэральныя зьмены ў эканоміцы, рэформу дзяржаўнага кіраваньня і лепшую сацыяльную абарону для нашых грамадзянаў.

Пра намер кампаніі «Гавары праўду» актыўна ўдзельнічаць у парлямэнцкіх выбарах 2016 году былая кандыдат у прэзыдэнты Тацяна Караткевіч заявіла адразу пасьля леташніх прэзыдэнцкіх выбараў. 16 лістапада яна заклікала прыхільнікаў пераменаў далучацца да парлямэнцкага сьпісу «Так! За мірныя перамены».

Ваша меркаваньне

Паказаць камэнтары

XS
SM
MD
LG