Лінкі ўнівэрсальнага доступу

Магілёў: моладзевы актывіст адлічаны зь ліцэю


Радыё Свабода Адміністрацыя 1-га магілёўскага ліцэю змусіла бацькоў вучня 11-й клясы, актывіста моладзевага руху Максіма Азарава спыніць навучаньне. Бацькам заявілі: калі яны самі не забяруць дакумэнтаў, іхнага сына адлічаць з дысцыплінарных меркаваньняў.

14 верасьня Максіма Азарава разам з дваццацьцю моладзевымі актывістамі затрымалі міліцыянты ў двары прыватнага дому, дзе актывісты праводзілі сход. Супрацоўнікі міліцыі дзьве гадзіны высьвятлялі ягоную асобу й вялі прафіляктычную гутарку.

Са словаў Максіма Азарава, менавіта затрыманьне і стала фармальнай нагодай для адміністрацыі, каб адлічыць яго. Максім кажа, што яшчэ чацьвярых вучняў ліцэю, якіх затрымалі 14 верасьня, адміністрацыя папярэдзіла.

У ліцэі Максім Азараў адвучыўся два гады. Падчас прэзыдэнцкай кампаніі актыўна агітаваў за Аляксандра Мілінкевіча, чым выклікаў нараканьні адміністрацыі ліцэю. За ўвесь час грамадзкай дзейнасьці Максіма Азарава затрымалі толькі аднойчы.
XS
SM
MD
LG