Дзень у гісторыі
16 красавіка 1973 году ў гарадзкім пасёлку Вялікая Бераставіца Горадзенскай вобласьці нарадзіўся Анджэй Пачобут — журналіст, грамадзкі дзеяч, сябра незарэгістраванага Саюзу палякаў Беларусі, палітвязень.
У 2002 годзе прыйшоў у журналістыку. Працаваў у першых незалежных горадзенскіх газэтах «Пагоня», «Дзень», «Мясцовы час», рэспубліканскай газэце «Народная воля», газэце СПБ на польскай мове Głos znad Niemna («Голас з-над Нёману»). Быў рэдактарам часопіса СПБ Magazyn Polski na uchodźstwie, карэспандэнтам буйнога польскага выданьня Gazeta Wyborcza. Займаўся тэмамі, зьвязанымі з гісторый спэцслужбаў СССР, антысавецкага супраціву ў Заходняй Беларусі, Арміяй Краёвай.
За артыкул пра напад СССР на Польшчу ў верасьні 1939-га Пачобута абвінавацілі ў «распальваньні варожасьці па нацыянальнай прыкмеце». Таксама ў матэрыялах крымінальнай справы фігуравалі заявы журналіста ў абарону польскай меншасьці ў Беларусі, артыкул пра здушэньне беларускіх пратэстаў у 2020 годзе і тэкст 2006 году пра аднаго з камандзіраў польскага антыкамуністычнага падпольля на Горадзеншчыне.
У 2023-м Пачобуту вынесьлі прысуд — 8 гадоў калёніі.
ТАКСАМА Ў ГЭТЫ ДЗЕНЬ
1818 — беларускі паэт Ян Чачот уступіў у падпольнае студэнцкае таварыства філяматаў. Урачыстасьць адбылася на ўзьлеску пад Вільняй. Рэкамэндацыю Чачоту даў ягоны школьны сябра з Наваградку паэт Адам Міцкевіч. Гэтая падзея прадвызначыла як лёс удзельнікаў таварыства, так і разьвіцьцё беларускай нацыянальнай ідэі на самым яе пачатку.
1914 — у Беларусі адбылася першая авіяцыйная катастрофа на вайсковым лётнішчы ў Лідзе. Загінулі падпаручнік Вятчынкін і мэханік Кавальчук. Яны выпрабоўвалі самалёт «Ньюпар-IV», які на вышыні 300 мэтраў раптам пайшоў уніз.
1945 — савецкія войскі пачалі Бэрлінскую наступальную апэрацыю.
2003 — быў падпісаны Атэнскі трактат, датычны прыняцьця ў Эўрапейскі зьвяз дзесяці дзяржаваў — Вугоршчыны, Польшчы, Кіпру, Літвы, Латвіі, Мальты, Славаччыны, Славеніі, Чэхіі ды Эстоніі.
2023 — у Вільні прайшла першая богаслужба беларускага праваслаўнага прыходу ў юрысдыкцыі Канстантынопальскага (Сусьветнага) патрыярхату.
У гэты дзень нарадзіліся
1844 — Анатоль Франс, францускі пісьменьнік.
1832 — Альфрэд Ромэр, мастак, скульптар, этнограф, удзельнік паўстаньня 1863-1864 гадоў.
1864 — Аляксандар Слупскі, беларускі і расейскі гісторык і археоляг.
1889 — Чарлі Чаплін, актор, рэжысэр, сцэнарыст.
1891 — Язэп Варонка — першы прэмʼер і міністар замежных спраў ураду БНР.
1924 — Алег Луцэвіч, мастак і пэдагог.
1927 — Бэнэдыкт XVI, папа Рымскі ў 2005–2013 гадах.
1928 — Алег Сурскі, дызайнэр, мастак, арт-крытык.
1931 — Вацлаў Жыдліцкі, чэскі літаратуразнавец, перакладчык беларускай літаратуры.
1935 — Анатоль Клышка, пісьменьнік, аўтар беларускага «Буквара», які ўпершыню выйшаў у сьвет у 1969 годзе і перавыдаваўся больш як 20 разоў. Пераклаў на беларускую мову Новы Запавет.
1971 — Натальля Зьверава, беларуская тэнісістка.
У памяці
1113 — Сьвятаполк ІІ Тураўскі, князь з роду Рурыкавічаў, што ўладарыў у Тураве ў канцы ХІ стагодзьдзя.
1828 — Франсыска Гоя, гішпанскі мастак.
1940 — Адам Багдановіч, беларускі фальклярыст, этнограф і мовазнаўца, бацька Максіма Багдановіча.
1972 — Ясунары Кавабата, японскі пісьменьнік, ляўрэат Нобэлеўскай прэміі па літаратуры.
