Эканамічны суд Берасьцейскай вобласьці аштрафаваў мясцовага жыхара на 1200 рублёў за дзейнасьць, «накіраваную на сыстэматычнае атрыманьне прыбытку ад аказаньня паслуг у прадастаўленьні ўезду па-за чаргой у пункт пропуску».
Як адзначаецца ў паведамленьні прэсавай службы, у судзе разглядалі эпізод, які меў месца 7 сакавіка 2024 году, калі мужчына прапанаваў за 170 даляраў сваю дапамогу для больш хуткага перасячэньня мяжы праз пункт пропуску «Берасьце». Высьветлілася, што ён спрабаваў прадаць месца ў аўтамабільнай чарзе супрацоўніку падатковай інспэкцыі па Берасьцейскай вобласьці.
Як вынікае з судовага рашэньня, гэтая сытуацыя была правакацыяй, каб атрымаць доказы яго «супрацьпраўнай дзейнасьці». Мужчыну, жыхару Берасьцейскага раёну, інкрымінавалі частку 2 артыкулу 13.3 Кодэксу аб адміністрацыйных правапарушэньнях («Незаконная прадпрымальніцкая дзейнасьць»).
«Супрацьпраўную дзейнасьць грамадзяніна Т. спыніў падатковы орган шляхам абвяшчэньня аб правядзеньні датычна яго праверкі з выкарыстаньнем мэтаду кантрольнага афармленьня заказу», — адзначаецца ў афіцыйным паведамленьні.
Суд пацьвердзіў, што абвінавачаны прадаваў месцы ў аўтамабільнай чарзе з жніўня 2022-га да сакавіка 2024 году. Як адзначаецца ў матэрыялах справы, гэта пацьвердзілі больш за 20 тысяч тэлефонных злучэньняў з тэрыторыі, прылеглай да кантрольна-прапускнога пункту «Варшаўскі мост».
