У ноч на 8 красавіка расейскія войскі атакавалі тэрыторыю Ўкраіны 24 баявымі дронамі, авіяцыйнай ракетай і артылерыйскімі снарадамі.
Як паведамілі ў апэратыўным камандаваньні Паветраных сіл Украіны, над пяцьцю абласьцямі — Адэскай, Мікалаеўскай, Кіраваградзкай, Хмяльніцкай і Жытомірскай зьбілі 17 бесьпілётнікаў.
У Адэсе пашкодзілі лягістычна-транспартны цэнтар
Кіраўнік Адэскай вобласьці Алег Кіпер паведаміў аб пацэльваньні ў інфраструктурны аб’ект у Адэскім раёне.
«Пашкодзілі лягістычна-транспартны аб’ект. Аскепкамі зьбітага „шахеду“ таксама пашкодзіла АЭС. Праваахоўнікі фіксуюць наступствы чарговага злачынства расейцаў», — паведаміў Алег Кіпер у сваім Telegram-канале.
На Мікалаеўшчыне — праблемы з электраэнэргіяй, яшчэ ў двух рэгіёнах ёсьць параненыя
Паралельна з дронамі расейскія войскі наносяць артылерыйскія ўдары па Мікалаеўскай вобласьці. У выніку 14 населеных пунктаў рэгіёну засталіся без электрычнасьці.
У Жытомірскай вобласьці атакавалі інфраструктурны аб’ект, але ўлады пакуль не паведамляюць аб маштабах удару. Папярэдне, ахвяр няма.
Улады Кіраваградзкай і Хмяльніцкай абласьцей пакуль не ўдакладняюць аб наступствах удару.
Ад артылерыі і мінамётаў, як і раней пакутуюць памежныя вобласьці — Чарнігаўская, Сумская, Херсонская і Харкаўская.
У Харкаўскай вобласьці пяць чалавек атрымалі раненьні, у Херсонскай — тры чалавекі параненыя.
У Расеі ў дзьвюх абласьцях заявілі аб атаках дронамі
Губэрнатар Курскай вобласьці Раман Старавойт паведаміў, што «украінскі бесьпілётнік скінуў выбухоўку на тэрыторыю колішняга сьпіртзаводу», але ніхто з жыхароў не пацярпеў.
Паводле губэрнатара Белгарадзкай вобласьці Вячаслава Гладкова, у рэгіёне ад артылерыйскіх абстрэлаў і дрона пацярпелі пяць раёнаў і абласны цэнтар. Ёсьць пашкоджаньні ў жылым і прыватных сэктарах. Папярэдне, ніхто не пацярпеў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
