Увечары 6 красавіка пратэстоўцы зноў выйшлі на вуліцы Тэль-Авіва, Кесарыі і Хайфы, патрабуючы адстаўкі прэм’ер-міністра Ізраіля Біньяміна Нэтаньяху і правядзеньня датэрміновых выбараў у краіне, піша CNN.
Таксама пратэстоўцы патрабуюць, каб урад заключыў пагадненьне па вызваленьні закладнікаў, захопленых палестынскай групоўкай ХАМАС 7 кастрычніка 2023 году. Групоўка прызнаная тэрарыстычнай у ЗША і Эўразьвязе.
«Мы пераканаліся, што нашы закладнікі вернуцца да нас дзякуючы пагадненьням, а не баявым дзеяньням», — сказаў арганізатаріерусалімскага аддзяленьня Форума семʼяў закладнікаў і зьніклых бязь вестак Том Баркай, выступаючы перад пратэстоўцамі.
У Тэль-Авіве пратэстоўцы накіраваліся да штаб-кватэры прафсаюзу Гістадрут, каб запатрабаваць ад старшыні арганізацыі абʼявіць буйнамаштабную забастоўку. Такім чынам пратэстоўцы хочуць аказаць ціск на ўрад, каб ён пагадзіўся заключыць пагадненьне па вызваленьні закладнікаў з сэктару Газа.
Як перадае The Times of Israel, людзі таксама скандавалі «Элад, нам шкада!». Раней у суботу Армія абароны Ізраілю (ЦАХАЛ) заявіла, што яны вярнулі цела закладніка Элада Каціра, які знаходзіўся ў палоне ля радыкальнай палестынскай групоўкі «Ісламскі джыхад». У ЦАХАЛ мяркуюць, што яго забілі ў сярэдзіне студзеня.
Паводле меркаваньні The Times of Israel, гэта самыя маштабныя дэманстрацыі ў Ізраілі з 7 кастрычніка 2023 году. Газэта таксама паведамляе пра сутычкі пратэстоўцаў з паліцыяй у Тэль-Авіве. Падчас разгону дэманстрантаў былі затрыманыя чатыры чалавекі, пажылога мужчыну зьбіў паліцэйскі конь.
Вайна Ізраілю з ХАМАСам. Асноўнае
- 7 кастрычніка Ізраіль зазнаў ракетны ўдар з боку сэктару Газа, а баевікі руху ХАМАС прарваліся на тэрыторыю краіны, забіўшы ня меней за 260 удзельнікаў музычнага фэсту і захапіўшы сотні закладнікаў. Некаторых людзей расстрэльвалі проста на вуліцах.
- Уварваньне з сэктару Газа адбылося ў 50-ю гадавіну пачатку вайны Суднага дня 1973 году.
- Армія абароны Ізраілю (ЦАХАЛ) у адказ на атаку пачала ваенную апэрацыю «Жалезныя мячы». Ужо 8 кастрычніка Ізраіль афіцыйна абвясьціў стан вайны.
- ХАМАС папярэдзіў, што будзе забіваць аднаго з закладнікаў кожны раз, калі ізраільскія вайскоўцы будуць бамбіць цывільныя аб’екты ў Газе.
- Іран заявіў, што не бярэ ўдзелу ў вайне, але адкрыта заявіў пра падтрымку дзеяньняў ХАМАСу. Найвышэйшы ўладар Ірану аятала Алі Хамэнэі заявіў: «Мы цалуем рукі тым, хто плянаваў напад на сыянісцкі рэжым».
- Колькасьць параненых беларусаў на 10 кастрычніка — 3 чалавекі. Стан адной з параненых жанчын цяжкі.
- 10 кастрычніка ў кібуцы Кфар Аза побач з сэктарам Газа выявілі целы дзясяткаў забітых, у тым ліку малых дзяцей.
- Міністар абароны Ізраілю Яаў Галант 11 кастрычніка заявіў, што войска пераходзіць да поўнамаштабнага наступу на сэктар Газа.
- Лібанская ўзброеная групоўка «Хезбала» 11 кастрычніка абстраляла супрацьтанкавымі ракетамі пазыцыі ізраільскіх вайскоўцаў і заявіла, што забіла і параніла іх.
- Па стане на 17 кастрычніка вядома, што ў Ізраілі з пачатку вайны загінулі трое грамадзян Беларусі.
- Ізраіль у лістападзе пайшоў у атаку на сэктар Газа і заявіў аб пашырэньні наземнай апэрацыі.
- 22 лістапада стала вядома, што Ізраіль і ХАМАС у Катары падпісалі пагадненьне ад замірэньні на 4 дні. Пазьней замірэньне падоўжылі, але ўжо 30 лістапада яно спынілася пасьля ракет з Газы па Ізраілі, заявілі ў ЦАХАЛ.
- За час замірэньня з палону ХАМАС было вызвалена 105 закладнікаў, а з ізраільскіх турмаў 240 палестынскіх зьняволеных.
- 6 студзеня Ізраіль заявіў пра тое, што поўнач Газы зачышчаная ад баевікоў ХАМАС.
- Ахвяры: па стане на 19 лютага 2024 году каля 1160 чалавек у Ізраілі, у асноўным мірных жыхароў, паводле зьвестак AFP на падставе ізраільскіх лічбаў. Баевікі ў першы дзень вайны захапілі каля 250 закладнікаў, 130 зь якіх застаюцца ў Газе, у тым ліку 30 меркавана загінуўшых, паводле зьвестак Ізраіля.
Міністэрства аховы здароўя Газы паведамляе, што ў выніку ізраільскай ваеннай кампаніі загінулі як мінімум 28 985 чалавек, пераважна жанчыны і дзеці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
