Памежная ахова Польшчы прызнала больш павольны і пільны дагляд падарожнікаў на мяжы зь Беларусьсю і растлумачыла гэта «пагрозамі нелегальнай міграцыі», празь якія афіцэраў з пункту пропуску ў Тарэспалі перакідваюць на стрымліваньне мігрантаў у лясах. Пра гэта ведамства паведаміла «Белсату».
«Белсат» накіраваў запыт у Памежную ахову Польшчы 3 красавіка, калі ў Берасьці ўтварылася чарга з 370 легкавікоў і 38 аўтобусаў. У чатах, дзе падарожнікі абмяркоўваюць праходжаньне мяжы, наракалі, што польскія памежнікі марудна працуюць і не адкрываюць усе каналы на тэрмінале. Таксама зьявілася неафіцыйная інфармацыя, што на польскім баку афіцэры занадта пільна правяраюць усіх таму, што памежнікі злавілі мігранта, які трапіў на тэрыторыю Польшчы зь Беларусі.
Сьпікер Надбужанскага аддзелу Памежнай аховы Польшчы, які кіруе пунктам пропуску ў Тарэспалі, Дар’юш Сяніцкі ў камэнтары «Белсату» пацьвердзіў, што міграцыйны крызіс на мяжы адбіваецца на хуткасьці афармленьня падарожнікаў:
«Раптоўныя, непрадбачаныя падзеі, што нясуць прыкметы недатыкальнасьці дзяржаўнай мяжы, якія ўзьнікаюць у выніку міграцыйнага ціску на польска-беларускай мяжы, могуць абумовіць неабходнасьць прыняцьця дынамічных і рашучых захадаў. Гэтыя захады прадугледжваюць перасоўваньне наяўных асабовых рэсурсаў супрацоўнікаў ад памежных праверак для аховы дзяржаўнай мяжы на месцах так званай „зялёнай мяжы“», — сказаў ён.
Сяніцкі папракнуў беларускіх калегаў у «недастатковай ахове дзяржаўнай мяжы» і заявіў, што ў сувязі з гэтым польскія памежнікі «абавязаныя рабіць больш дэталёвы кантроль асобаў, якія ўяжджаюць у Польшчу — да тае пары, пакуль ня зьнікне рэальная пагроза нелегальнай міграцыі».
Адначасова прадстаўнік Надбужанскага аддзелу Памежнай аховы Польшчы запэўніў, што ў тарэспальскім пункце «адэкватна выкарыстоўваюць інфраструктуру, якая ёсьць», а ў прыярытэтным парадку там афармляюць менавіта аўтобусы.
Паводле апошніх зьвестак Дзяржаўнага памежнага камітэту Беларусі, на 12:00 5 красавіка ў чарзе на выезд у Польшчу стаялі 250 легкавых аўтамабіляў і 35 аўтобусаў.
Празь мігранцкі крызіс большасьць памежных пераходаў на мяжы Беларусі і Польшчы закрытыя, для легкавых машын дзейнічае толькі пераход у Тарэспалі.
- У апошні час назіраецца значны рост незаконных спробаў перасячэньня мяжы Беларусі з краінамі ЭЗ. За тры дні красавіка краіны Эўразьвязу спынілі 743 спробы нелегальнага пранікненьня мігрантаў зь Беларусі — на 34,1% больш, чым сумарна за студзень і люты (554), у 3,7 раза больш, чым за першыя тры дні сакавіка (199), і ў 32,3 раза больш, чым за першыя тры дні студзеня (23), сьведчыць праведзены «Позіркам» аналіз зьвестак памежных службаў. У першыя тры дні лютага спробы перасячы мяжу незаконным шляхам не фіксаваліся.
- За сакавік Польшча перадухіліла 3438 спробаў незаконнага перасячэньня мяжы — у 9,7 раза больш, чым у лютым (356), і ў 39,5 раза больш, чым у студзені. (87).
- Днямі ў Польшчы за перавозку двух нелегальных мігрантаў асудзілі і дэпартавалі беларуса.
Мігранцкі крызіс 2021-2024. Асноўнае
- У ліпені 2021 году Аляксандар Лукашэнка заявіў, што з прычыны санкцыяў Беларусь больш ня будзе стрымліваць нелегальную міграцыю ў краіны Эўразьвязу. Найперш вялікія патокі мігрантаў накіраваліся ў Літву, па стане на верасень — звыш 4,2 тысячы чалавек з краінаў Азіі і Афрыкі. Затым напружаньне на сваіх межах адчулі Латвія і Польшча.
- Рэагуючы на крызіс, Літва і Польшча пачалі будаваць сьцяну на мяжы зь Беларусьсю.
- Урады Літвы, а затым Латвіі і Польшчы, улетку 2021-га зрабілі істотна больш строгім заканадаўства аб нелегальным перасячэньні дзяржаўнай мяжы, а таксама выслалі ў памежныя зь Беларусьсю раёны падмацаваньне з вайсковых злучэньняў. Лукашэнку абвінавацілі ў спрыяньні нелегальнай міграцыі ў краіны Эўразьвязу.
- У Літве ў лягерах для ўцекачоў мігранты неаднаразова ладзілі бунты і намагаліся зьбегчы.
- Улады Польшчы зь верасьня распачалі затрыманьні і дэпартацыі людзей, якія дапамагаюць мігрантам нелегальна перасякаць мяжу. Сярод іх як грамадзяне Польшчы, так і грамадзяне Беларусі, краінаў Азіі, у тым ліку некаторыя асобы, што маюць від на жыхарства ў краінах Эўразьвязу.
- Прэм’ер-міністар Польшчы Матэвуш Маравецкі выказаў упэўненасьць, што сцэнар «гібрыднай агрэсіі» супраць Эўразьвязу быў распрацаваны Менскам не самастойна, а ў шчыльнай супрацы з Масквой.
- Прэс-сакратар каардынатара спэцслужбаў Польшчы Станіслаў Жарын 27 верасьня заявіў, што 20% затрыманых мігрантаў маюць сувязі з Расеяй, пра што сьведчаць знойдзеныя доказы. Міністар унутраных спраў і адміністрацыі Мар’юш Каміньскі сказаў, што беларускія памежнікі даюць мігрантам псыхатропныя сродкі, у тым ліку дзецям.
- 30 верасьня ПАРЭ катэгарычна асудзіла практыку вяртаньня мігрантаў «у трэцюю краіну, дзе ім ня можа быць гарантавана міжнародная абарона», і нагадала Латвіі, Літве і Польшчы пра забарону на калектыўную высылку іншаземцаў.
- 8 кастрычніка Варшава заявіла, што трактуе паводзіны беларускага боку як «агрэсіўныя дзеяньні супраць Польшчы». Зьявіўся шэраг відэадоказаў, што беларускія памежнікі ня толькі не спыняюць мігрантаў, але і актыўна дапамагаюць ім нелегальна перасякаць польскую мяжу.
- На межах Беларусі з Польшчай і Літвой ад пачатку міграцыйнага крызісу загінулі сама меней 9 чалавек.
- 8 лістапада раніцай на мяжы зь беларускага боку заўважылі буйную калёну зь некалькіх сотняў мігрантаў, якія рушылі ў суправаджэньні ўзброеных сілавікоў да калючага дроту на мяжы з Польшчай, намагаючыся перасекчы мяжу. Паводле розных ацэнак, іх колькасьць была ад 2 да 4 тысяч чалавек. Многія атрымалі візы ў беларускім дыпляматычным прадстаўніцтве ў Анкары, турэцкія авіякампаніі ўдзельнічаюць у перакіданьні мігрантаў у Беларусь.
- У наступныя дні мігранты пры спрыяньні беларускіх сілавікоў сталі лягерам на памежнай паласе. Курд з Іраку Рэбаз Наджм Хама Саід сказаў Свабодзе, што беларуская міліцыя дапамагае высякаць дрэвы для вогнішчаў на беларускай жа тэрыторыі. Некаторым групам удалося прарвацца на польскую тэрыторыю, але вайскоўцы затрымалі ўсіх парушальнікаў.
- 10 лістапада эўрадэпутат Радаслаў Сікорскі заявіў, што крызіс на мяжы ініцыяваны пры падтрымцы Масквы, а Лукашэнку трэба прызнаць тэрарыстам і выдаць Міжнароднаму трыбуналу. Шэраг іншых эўрапейскіх палітыкаў таксама выказалі ўпэўненасьць, што Пуцін з дапамогай Лукашэнкі расхіствае Эўропу, пачуліся заклікі да ЭЗ дзейнічаць актыўна, а не чакаць.
- 11 лістапада ў паветранай прасторы Беларусі пачалі патруляваць межы расейскія бамбавікі Ту-22М3. Яны належаць паветрана-касьмічным сілам Расеі.
- 11 лістапада Фэдэральная паліцыя Нямеччыны заявіла, што толькі за першыя дні лістапада ў краіну трапілі больш за тысячу мігрантаў, якія выкарысталі Беларусь як краіну транзыту.
- Са жніўня польскія памежнікі спынілі больш за 33 тысячы спробаў нелегальнага перасячэньня мяжы з боку Беларусі, летась іх было 88.
- 15 лістапада больш за 3 тысячы мігрантаў сабраліся на беларускім памежным пераходзе «Брузгі» перад лініяй польскай мяжы, умацаванай часовымі загародамі і шарэнгай польскіх вайскоўцаў.
- Па словах прэс-сакратара Лукашэнкі Натальлі Эйсмант, у Беларусі агулам каля 7 тысяч мігрантаў, якія спадзяюцца трапіць у Нямеччыну.
- 22 лістапада ў Бэрліне адмовіліся прымаць каля 2 тысяч чалавк з Блізкага Ўсходу, якія прыбылі ў Беларусь пасьля арганізацыі рэжымам Лукашэнкі мігранцкага крызісу.
- 25 лістапада мігранты правялі акцыю пратэсту на памежжы, заяўляючы, што ня хочуць вяртацца назад у свае краіны.
- На больш чым дзесяці эвакуацыйных рэйсах у Ірак і Сырыю ў лістападзе-сьнежні Беларусь пакінулі каля 4,5 тысяч мігрантаў.
- На пачатку 2022 году сталі вядомыя тэрміны пабудовы агароджаў на мяжы зь Беларусьсю. Польшча адзначыла, што агароджу дабудуюць да канца чэрвеня, а Літва, што да восені.
- За 2023 год памежнікі суседніх зь Беларусьсю краін Эўразьвязу спынілі 42 тысячы спробаў нелегальнага пранікненьня на сваю тэрыторыю, што на траціну больш за 2022 год.
