Журналістку абвінавачваюць ва ўдзеле ў «экстрэмісцкай супольнасьці ФБК» (Фонд барацьбы з карупцыяй, раней заснаваны памерлым у турме палітвязьнем Аляксеем Навальным), паведамляе з суду выданьне «Собеседник».
Судовы прыстаў забараніў усім, хто прыйшоў на паседжаньне, вітацца з Фаворскай, апладзіраваць ёй, крычаць і выдаваць любыя гукі — пад пагрозай неадкладнага выправаджэньня з будынку і складаньня адміністрацыйнага пратаколу на «парушальніка».
«А хаця б сэрцайка ёй можна паказаць рукамі? — спытала журналістка «Собеседника» Алена Мільчаноўска. — Усё ж не чужая».
«Сэрцайкі па-за законам! — на поўным сур’ёзе адказаў судовы прыстаў. — Гэта будзе расцэнена як таемны знак экстрэмісцкай супольнасьці».
Пазьней судзьдзя Алена Ленская закрыла паседжаньне.
Выданьне «Медуза» падкрэсьлівае, што дыялёг журналісткі і прыстава адбыўся, верагодна, да паседжаньня: журналісты іншых СМІ яго не зафіксавалі.
Журналістку SotaVision Антаніну Фаворскую арыштавалі па справе супраць ФБК 29 сакавіка. Яна асьвятляла ўсе паседжаньні судоў па справах Аляксея Навальнага, пісала рэпартаж з Харпа, куды этапавалі палітыка, і здымала пахаваньне Навальнага. Фаворскай ставяць у віну крымінальны артыкул аб удзеле ў «экстрэмісцкай супольнасьці».
Падчас выбарчай кампаніі 2020 году ў Беларусі знак «сэрцайка», складзены зь вялікіх і ўказальных пальцаў абедзьвюх рук, стаў сымбалем каманды Віктара Бабарыкі — яго падчас перадвыбарчай агітацыйнай кампаніі аб'яднанага штабу дэмакратычных сіл паказвала каардынатарка штабу Бабарыкі Марыя Калесьнікава, сам Віктар Бабарыка на той час быў за кратамі.
У 2021 годзе падчас суду над Віктарам Бабарыкам судзьдзя забараніў яму «паказваць сэрцайка і іншыя жэсты».
Знак «сэрцайка» паказваў і расейскі апазыцыйны палітык Аляксей Навальны — на паседжаньні Сіманаўскага суду Масквы, які адправіў яго ў калёнію.
