Лінкі ўнівэрсальнага доступу

ВВС: расейскія зьняволеныя, якія ваююць, больш не атрымліваюць памілаваньня


Ілюстрацыйная выява
Ілюстрацыйная выява

Расейскія зьняволеныя, якія ўдзельнічалі ў вайне супраць Украіны, замест памілаваньня ад прэзыдэнта Ўладзіміра Пуціна атрымліваюць цяпер умоўнае вызваленьне, а ваяваць ім давядзецца да канца вайны.

Пра гэта гаворыцца ў расьсьледаваньні расейскай службы ВВС.

Вэрбаваць зьняволеных з расейскіх калёніяў летам 2022 году пачаў заснавальнік ПВК «Вагнэр» Яўгеній Прыгожын. Зь лютага 2023 году адпраўкай зьняволеных на фронт займаецца Мінабароны Расеі. Завэрбаваным зьняволеным спачатку абяцалі грошы і памілаваньне праз паўгода ўдзелу ў баявых дзеяньнях.

У сярэдзіне 2023 году Пуцін пацьвердзіў, што памілаваў зьняволеных, якія вярнуліся з вайны ва Ўкраіне. Сярод памілаваных былі асуджаныя за забойствы і іншыя цяжкія злачынствы.

Журналісты ВВС з паведамленьняў сваякоў зьняволеных і расповедаў саміх удзельнікаў вайны даведаліся, што завэрбаваныя з калёніяў цяпер заключаюць кантракты зь Мінабароны РФ на адзін год, а не на шэсьць месяцаў, як было раней. Кантракт працягваецца аўтаматычна.

Акрамя таго, асуджаныя ўжо не атрымліваюць памілаваньня ад Пуціна і ваююць у статусе ўмоўна вызваленых. Норма аб гэтым, нагадвае выданьне, зьявілася ў законе зусім нядаўна. Гэта ня ўмоўна-датэрміновае вызваленьне, бо для яго атрыманьня патрэбнае рашэньне суду. Для ўмоўнага вызваленьня дастаткова рашэньня адміністрацыі калёніі альбо ваенкамату, дзе зьняволеныя падпісваюць кантракт. Удзел прэзыдэнта ў гэтым працэсе таксама не патрабуецца, удакладняюць аўтары публікацыі.

Поўнае вызваленьне і пагашэньне судзімасьці зьняволеныя змогуць атрымаць толькі ў выпадку атрыманьня дзяржаўнай узнагароды або звальненьня з прычыны заканчэньня вайны, страты здароўя або дасягненьня гранічнага ўзросту.

Журналісты вывучылі паведамленьні сваякоў байцоў злучэньня «Шторм Z» у чатах і прыйшлі да высновы, што набор спэцроты зьняволеных спыніўся яшчэ ў жніўні мінулага году. Зь верасьня зьняволеных запісваюць у падразьдзяленьне «Шторм V».

Паводле дадзеных, якія ВВС аналізуе разам з выданьнем «Медиазона» і камандай валянтэраў, па стане на 23 студзеня на вайне супраць Украіны загінулі больш за восем тысяч зьняволеных. Больш за тысячу зь іх ваявалі ў атрадах «Шторм Z» ці «Шторм V».

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG