Сустракаць самалёт прыехалі прадстаўнікі пасольства Турцыі і намесьнік гендырэктара аэрапорта па зьнешнеэканамічнай дзейнасьці Мікіта Сярэдзіч. Першым рэйсам у Менск прыляцела кіраўніцтва Southwind Airlines, адзначае партал Reform.by.
Раней паведамлялася, што Southwind Airlines будзе лятаць з Істамбула ў Менск з 15 сьнежня, а час палёту складзе 3 гадзіны і 10 хвілін. Мяркуючы па дадзеных сэрвісу flightradar24.com, першы палёт праходзіў над тэрыторыяй ЭЗ, затым борт паляцеў у бок Расеі і ўжо з Расеі ўляцеў на тэрыторыю Беларусі. Рэсурс motolko.help сьцьвярджае, што авіякампанія пакуль не змагла атрымаць дазвол МЗС Беларусі на заход у паветраную прастору Беларусі з боку ЭЗ.
Турэцкая авіякампанія з расейскімі каранямі Southwind Airlines пачала працаваць у 2022 годзе ў якасьці чартарнай кампаніі, першапачаткова арыентуючыся на зносіны паміж Турцыяй і Расеяй, аднак пазьней адкрыла і іншыя напрамкі. Выданьне Bild, спасылаючыся на ўнутраныя высновы МУС Польшчы, паведамляла аб існаваньні «вельмі высокай рызыкі» мэтанакіраванай кантрабанды нелегальных мігрантаў у Заходнюю Эўропу праз новую авіякампанію.
- Пасьля пачатку вайны ва Ўкраіне менскі аэрапорт пакінулі авіякампаніі, якія не падтрымалі міжнародныя санкцыі, накладзеныя на беларускую авіяцыю ў сувязі з прымусовай пасадкай самалёта авіякампаніі RyanAir з Раманам Пратасевічам і Соф’яй Сапегай на борце. У Менск працягвалі лятаць FlyDubai I Turkish Airlines, але з пачаткам вайны і яны адмянілі свае рэйсы.
- Цяпер у аэрапорт прыйшла турэцкая авіякампанія, якая ўзьнікла ў 2022 годзе і якую завязваюць з расейскім турыстычным бізнэсам. Авіякампанія мае 14 самалётаў і ў асноўным дастаўляе чартэрнымі рэйсамі на турэцкія курорты расейскіх турыстаў.
- У Істамбул зь Менску таксама лятае беларуская кампанія «Белавія».
