Як паведамляецца ў прэсавым рэлізе ураду Вялікай Брытаніі, Вялікая Брытанія, ЗША і Канада ўзначальваюць скаардынаваныя дзеяньні супраць парушальнікаў правоў чалавека і памагатых аўтарытарных урадаў ва ўсім сьвеце праз 75 гадоў пасьля ратыфікацыі Ўсеагульнай дэклярацыі правоў чалавека.
Санкцыі датычаць рэжымаў у Паўднёва-Ўсходняй Азіі, а таксама зьвязаных з урадам чыноўнікаў у Беларусі, Гаіці, Іране і Сырыі, якія ўдзельнічаюць у задушэньні свабод асобы.
Вялікая Брытанія, ЗША і Канада аб’явілі шырокі пакет санкцый, накіраваных супраць асоб, зьвязаных з парушэньнямі правоў чалавека ва ўсім сьвеце.
8 сьнежня Вялікая Брытанія абвясьціла аб увядзеньні 46 санкцый, уключаючы замарожваньне актываў і забарону на паездкі, у дзьвюх катэгорыях.
Першая зь іх накіравана на дзевяць фізычных асоб і пяць арганізацый за іх удзел у гандлі людзьмі ў Камбоджы, Лаосе і Мʼянме.
Другая накіравана супраць шэрагу асоб, зьвязаных з урадамі, судовымі органамі і органамі пракуратуры Беларусі, Гаіці, Ірану і Сырыі, за іх удзел у рэпрэсіях супраць грамадзян выключна за ажыцьцяўленьне асноўных свабодаў у гэтых краінах. Гэта ўключае ў сябе 17 беларускіх судзьдзяў, пракурораў і сьледчых, якія займаюцца палітычна матываванымі справамі супраць палітычных актывістаў, незалежных журналістаў і праваабаронцаў.
Вялікая Брытанія ўвяла новыя санкцыі супраць беларускіх судзьдзяў, сьледчых і пракурораў. Санкцыйны сьпіс зьмешчаны на сайце брытанскага ўраду.
У новы санкцыйны сьпіс трапілі:
- Раман Бізюк, пракурор, які быў дзяржабвінаваўцам у справе «Рэвалюцыйнага дзеяньня»;
- Сьвятлана Бандарэнка, судзьдзя суду Маскоўскага раёну Менску. Яна вынесла прысуд журналістцы Tut.by Кацярыне Барысевіч і лекару Арцёму Сарокіну ў справе аб абнародаваньні зьвестак мэдыцынскага характару пра забітага Рамана Бандарэнку.
- Мікалай Доля, судзьдзя Гомельскага абласнога суду, які разглядаў «справу Ціханоўскага»;
- Сяргей Епіхаў, судзьдзя Менскага абласнога суду, які разглядаў «справу „Атрадаў грамадзянскай самаабароны“»;
- Сяргей Гіргель, старшы пракурор Генэральнай пракуратуры;
- Таццяна Гракун, пракурорка, якая была дзяржабвінаваўцай у «справе Tut.by»
- Аляксандар Кароль, старшы пракурор Генэральнай пракуратуры, прадстаўляў дзяржабвінавачаньне на судзе над Алесем Пушкіным;
- Міхаіл Кавалёў, пракурор, прадстаўляў дзяржабвінавачаньне ў «справе Каардынацыйнай рады»;
- Сяргей Хрыпач, судзьдзя Менскага гарадзкога суду, які разглядаў «справу Рэвалюцыйнага дзеяньня»;
- Антон Каляга, сьледчы ў справе Праваабарончага цэнтру «Вясна».
- Валянціна Кулік;
- Ігар Любавіцкі;
- Дзяніс Мікушаў;
- Пётра Арлоў;
- Вячаслаў Тулейка;
- Марына Запасьнік;
- Валянціна Зінкевіч.
