Прэзыдэнт Украіны Ўладзімір Зяленскі заявіў, што амаль трэцяя частка тэрыторыі Ўкраіны забруджаная мінамі і расейскімі снарадамі, якія не разарваліся.
«174 тысячы квадратных кілямэтраў тэрыторыі Ўкраіны забруджаныя мінамі, якія заклаў акупант, і расейскімі снарадамі розных тыпаў, што не разарваліся. Гэтая забруджаная плошча — як дзьве тэрыторыі Аўстрыі. Гэта сотні тысяч супрацьпяхотных мін, ракет ад рэактыўнай артылерыі, авіяцыйных бомбаў, мінамётных снарадаў, якія не разарваліся і засталіся тырчаць у палях, у рэштках будынкаў, абапал дарог, у садах і парках, на агародах», — паведаміў Уладзімір Зяленскі ў сваёй прамове перад дэпутатамі парлямэнту Аўстрыі.
Плошча Ўкраіны складае 603,7 тысячы квадратных кілямэтраў, Аўстрыі — 83,8 тысячы квадратных кілямэтраў.
Украінскі прэзыдэнт расказаў, як расейскія салдаты летась перад сваім адыходам з Кіеўскай вобласьці наўмысна рабілі ў жылых дамах расьцяжкі і пакідалі гранаты.
«Ручная граната, якую хтосьці з расейскіх салдат замаскаваў пад плястыкавы кубак. Гэты было ў Браварскім раёне Кіеўскай вобласьці. Падствольная граната, якую расейцы разьмясьцілі ў звычайным доме пад векам фартэпіяна. Гэта было ў горадзе Буча. Ручная граната, якой замінавалі шафку на кухні дома. Уласьніка гэтага дома расейскія салдаты расстралялі, ягонае цела закапалі ў двары. Гэта было таксама ў Бучы, дарэчы», — расказаў Зяленскі.
«Супрацьпяхотная міна, замаскаваная пад нібыта звычайную торбу з рэчамі. Гэта было ў Ірпяні Кіеўскай вобласьці. Ручная граната, якую пакінулі ў звычайным доме ў пральнай машыне так, каб выбух адбыўся тады, калі чалавек проста адчыніць пральную машыну. Гэта было ў звычайным доме ў звычайнай вёсцы Кіеўскай вобласьці», — дадаў ён.
Зяленскі перакананы, што ўсе гэтыя факты — частка аўтапартрэта Расеі, які яна стварае сваёй агрэсіяй і вайной ва Ўкраіне.
У гэтыя дні ва Ўкраіне ўшаноўваюць памяць ахвяр расейскай акупацыі Кіеўскай, Чарнігаўскай і Сумскай абласьцей і адзначаюць гадавіну адступленьня расейскіх войскаў з поўначы Ўкраіны.
30 сакавіка споўнілася 400 дзён ад пачатку расейскага ваеннага поўнамаштабнага ўварваньня ва Ўкраіну.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
