Генпракуратура Кіргізстану разглядае Кадарыя як грамадзяніна Беларусі і лічыць рашэньне аб яго выдачы законным.
Чаму так сталася, ці былі раней падобныя выпадкі, зь якіх краін? Куды беларусам лепш ня ехаць, каб не апынуцца пад пагрозай высылкі ў Беларусь? І што рабіць, калі вы апынуліся перад такой пагрозай? Пра гэта ў эфіры Свабоды Premium расказвае юрыст-міжнароднік Алесь Міхалевіч.
«Украінскі пашпарт бароніць значна менш, чым палітычны прытулак. Трэба таксама разумець, што ў момант атрыманьня пашпарта той краіны, дзе ў вас быў палітычны прытулак, вы страчваеце статус уцекача. З пункту гледжаньня Кіргізстану, гэта проста грамадзянін Украіны, пра якога ёсьць зьвесткі, што ён і беларускі грамадзянін», — тлумачыць Міхалевіч.
Далейшы лёс грамадзяніна вырашае мясцовы суд. Адпаведна, любая такая экстрадыцыя будзе законнаю, дадае Міхалевіч. Дадатковы пашпарт любой іншай краіны ня ў стане гэтаму перашкодзіць. Больш за тое, у Беларусь з трэцяй краіны могуць выдаць і грамадзяніна іншай дзяржавы, у якога ўвогуле няма беларускага грамадзянства. Паводле Міхалевіча, наяўнасьць яшчэ аднаго грамадзянства нічога не дае ў гэтым выпадку.
