«Уплыў вайны на харчовую бясьпеку, энэргетыку і фінансы мае сыстэмны і сур’ёзны характар, які набірае абароты», — заявіў Антонію Гутэрыш, прэзэнтуючы другую справаздачу ААН аб наступствах вайны ва Ўкраіне.
Як паведамляе «Голас Амэрыкі», генэральны сакратар ААН дадаў, што «вайна пагражае выклікаць беспрэцэдэнтную хвалю голаду і галечы, пакінуўшы пасьля сябе сацыяльны і эканамічны хаос».
Паводле Антонію Гутэрыша, сёлета харчовы крызіс зьвязаны «з адсутнасьцю доступу» да асноўных прадуктаў харчаваньня, а ў наступным годзе «можа быць зьвязаны з нястачай ежы».
«Ёсьць толькі адзін спосаб спыніць буру, што насоўваецца: расейскае ўварваньне ва Ўкраіну мусіць быць спыненае», — падкрэсьліў генэральны сакратар ААН.
Антонію Гутэрыш заклікаў калег знайсьці шлях, які дазволіць бясьпечна і надзейна экспартаваць прадукты харчаваньня ўкраінскага паходжаньня праз Чорнае мора і бесьперашкодны доступ на сусьветны рынак для расейскіх прадуктаў харчаваньня і ўгнаеньняў.
У справаздачы ААН адзначаецца, што прыкладна 94 краіны, у якіх жывуць каля 1,6 мільярда грамадзян, «сур’ёзна могуць пацярпець як мінімум ад аднаго аспэкту крызісу і ня ў стане зь ім справіцца».
Кіеў 7 чэрвеня абвясьціў умовы, пры якіх магчыма аднаўленьне паставак украінскага збожжа на вонкавы рынак.
«Неабходнымі зьяўляюцца дзейсныя гарантыі бясьпекі для аднаўленьня суднаходзтва. Такія гарантыі маюць быць нададзеныя шляхам пастаўкі Ўкраіне адпаведнай зброі для абароны ўзьбярэжжа ад пагроз з мора і шляхам далучэньня ваенна-марскіх сіл трэціх краін для патруляваньня адпаведнай часткі акваторыі Чорнага мора», — адзначалася ў заяве Міністэрства замежных спраў Украіны.
3 чэрвеня прэзыдэнт Расеі Ўладзімір Пуцін заявіў, што Масква ня будзе перашкаджаць вывазу збожжа з Украіны. Ён прапанаваў зрабіць гэта праз акупаваныя Расеяй парты Марыюпалю і Бярдзянску, парты, якія кантралююцца Украінай, і па чыгунцы праз Румынію, Польшчу і Беларусь.
Прэзыдэнт Украіны Ўладзімір Зяленскі 6 чэрвеня заявіў, што Ўкраіна не гатовая разглядаць пытаньне экспарту ўласнага збожжа празь Беларусь.
Расея і Ўкраіна ўваходзяць у пяцёрку найбуйнейшых вытворцаў збожжа ў сьвеце. Пасьля пачатку ўварваньня расейскага войска ва Ўкраіну цэны на прадукты харчаваньня сталі рэзка падымацца. Уздым цэнаў на збожжа і на паліва адбіваецца на кошце любой ежы. Генэральны сакратар ААН Антонію Гутэрыш заяўляў у траўні, што галодная сьмерць на тле вайны пагражае 49 мільёнам жыхароў 43 краін сьвету.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
