Другі арышгт запар, цяпер за праўкраінскі лёзунг
44-гадовага Рыгора Камянюка, якога раней судзьдзя Міхаіл Макарэвіч пакараў 14 суткамі адміністрацыйнага арышту за ўдзел у антываеннай акцыі ў Менску, зноў затрымалі і асудзілі. Пра гэта паведамляе праваабарончы цэнтар «Вясна».
Камянюк мусіў выйсьці на волю 13 сакавіка, але сілавікі затрымалі яго зноў. На гэты раз паводле арт. 24.23 КаАП (парушэньне парадку арганізацыі ці правядзеньня масавых мерапрыемстваў).
Згодна з пратаколам, Камянюк, «знаходзячыся ў грамадзкім месцы — у адміністрацыйным будынку ІЧУ Акрэсьціна, выкрыкнуў «Слава Україні!».
Міліцыянты расцанілі гэта як пікетаваньне.
Камянюк пацьвердзіў падчас другога суда, што сапраўды прамовіў гэты лёзунг пасьля вынясеньня пастановы па мінулай адміністрацыйнай справе, але не меў палітычнай мэты, бо такім чынам «перадаваў сваякам, што ў яго ўсё добра».
Але сьведка-міліцыянт сьцьвярджаў, што «паводзіны, а таксама рэакцыя прысутных побач з Рыгорам аб’ектыўна сьведчылі пра палітычны матыў зьдзяйсьненьня прапавушэньня».
Пасьля паўнамасштабнага ўварваньня Расеі на тэрыторыю Украіны беларусы некалькі дзён ладзілі антываенныя акцыі ў многіх гарадах, за што шмат хто зь падвергнуўся перасьледу. Паводле падлікаў праваабаронцаў, усяго затрымалі мінімум 1500 грамадзян. Большасьць зь іх пакаралі адміністрацыйнымі арыштамі.
Выхавацельку асудзілі за 16 раздрукаваных улётак пра «два крыжыкі» на рэфэрэндуме пасьля даносу калег
У судзе Фрунзэнскага раёну Менску судзьдзя Ала Скуратовіч пакарала 3 гадамі «хатняй хіміі» 60-гадовую выхавацельку ў дзіцячым садку Ларысу Нікалаеву.
Нікалаеву абвінавацілі па ч. 2 арт. 191 Крымінальнага кодэксу за «перашкоду ажыцьцяўленьню права на ўдзел у рэфэрэндуме, працы Цэнтральнай камісіі Рэспублікі Беларусь па выбарах і правядзеньні рэспубліканскіх рэфэрэндумаў, камісій па рэфэрэндуме» за раздрукоўку 16 улётак з сайта xx2022.org з агітацыяй за «два крыжыкі» на бюлетэнях на рэфэрэндуме па зьменах у Канстытуцыю.
Праваабаронцы паведамляюць, што жанчына захоўвала ўлёткі ў стале на працы ў дзіцячым садку, але на яе напісалі данос. У выніку жанчыну затрымалі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
