Нацыянальная атамная кампанія «Енергоатом» заявіла, што паведаміла генэральнаму дырэктару МАГАТЭ, што пэрсанал Чарнобыльскай АЭС больш не займаецца рамонтам і абслугоўваньнем абсталяваньня станцыі.
«211 чалавек — тэхнічны пэрсанал і супрацоўнікі службы аховы — па-ранейшаму ня могуць зьмяніцца. Яны заступілі на зьмену напярэдадні расейскага ўварваньня на тэрыторыю аб’екта. У сувязі з тым, што сытуацыя пагаршаецца, усё больш актуальнай становіцца ініцыятыва МАГАТЭ ў гарантаваньні бясьпекі і фізычнай бясьпекі ўкраінскіх АЭС», — заявіў 13 сакавіка генэральны дырэктар Міжнароднага агенцтва атамнай энэргетыкі Рафаэль Мар’яна Гросі на сайце арганізацыі.
Раней генэральны дырэктар «Росатома» Аляксей Ліхачоў пацьвердзіў, што на Чарнобыльскай і Запароскай АЭС знаходзяцца расейскія атамнікі, якія «аказваюць кансультацыйную дапамогу» ўкраінскаму пэрсаналу станцый.
14 сакавіка «Росатом» паведаміў, што кіраваньне і эксплуютацыю Запароскай і Чарнобыльскай АЭС ажыцьцяўляе ўкраінскі пэрсанал, а «пры кансультацыйнай дапамозе расейскіх спэцыялістаў аднаўляецца энэргазабесьпячэньне Чарнобыльскай АЭС і сыстэма фізычнай абароны Запароскай АЭС».
Паводле іх, усе захады ажыцьцяўляюцца ў цесным кантакце з кіраўніцтвам МАГАТЭ.
Праз супярэчлівасьць заяў украінскіх і расейскіх атамнікаў, а таксама Міжнароднага агенцтва атамнай энэргетыкі, цяжка зрабіць высновы, што сапраўды адбываецца на тэрыторыі Чарнобыльскай АЭС і хто ажыцьцяўляе кантроль за сыстэмамі бясьпекі.
Дакладна вядомая колькасьць расейскіх атамнікаў на Запароскай АЭС — іх 11, і, паводле МАГАТЭ, «яны ў пытаньні эксплюатацыі ядзерных установак ня ўмешваюцца».
Ва ўкраінскім «Енергоатоме» пацьвердзілі, што цяпер усё 6 блёкаў Запароскай АЭС знаходзяцца пад кантролем украінскага пэрсаналу, які, у адрозьненьне ад чарнобыльскага, можа працаваць на ратацыйнай аснове.
У той жа час украінцы зьвяртаюць увагу на тое, што на тэрыторыі станцыі знаходзіцца 50 адзінак вайсковай тэхнікі, каля 400 расейскіх вайскоўцаў і шмат выбухоўкі і зброі.
«Фармальна акупанты ня ўмешваюцца ў працу АЭС, але ўсе тэхнічныя рашэньні пэрсанал вымушаны ўзгадняць з камандзірам захопнікаў. Супрацоўнікі станцыі знаходзяцца пад моцным псыхалягічным ціскам з боку акупантаў, увесь пэрсанал па прыбыцьці на станцыю старанна правяраюць узброеныя тэрарысты. Усё гэта нэгатыўна адбіваецца на працы і ставіць пад пагрозу ядзерную і радыяцыйную бясьпеку», — падкрэсьлілі ва ўкраінскай кампаніі «Енергоатом».
У Славуцічы паведамілі, што з раніцы 14 сакавіка ЧАЭС і горад зноў заставаліся без электрычнасьці
«Учора ўдалося аднавіць электразабесьпячэньне ЧАЭС на некалькі гадзін, але ненадоўга. Зноў лінія не працуе», — адзначаецца ў паведамленьні гарадзкой рады Славуціча.
Паводле яе, горад забясьпечаны цяплом і вадой, але паліва засталося вельмі мала, таму «няма магчымасьці запраўляць машыны для дастаўкі дроваў і малака».
Гарадзкія ўлады зьвярнуліся да жыхароў горада з просьбай падзяліцца запасамі паліва.
Увечары 13 сакавіка міністар энэргетыкі Ўкраіны Герман Галушчанка заявіў аб аднаўленьні электразабесьпячэньня Чарнобыльскай АЭС, страчанага ў выніку пашкоджаньня высакавольтнай лініі ад абстрэлаў расейскімі войскамі. Больш як два дні расейцы не дазвалялі ўкраінскім энэргетыкам выехаць на месца для рамонтных работ. Звыш двух сутак сыстэмы бясьпекі ядзерных аб’ектаў Чарнобыльскай АЭС і зоны адчужэньня сілкаваліся ад дызэльных генэратараў.
9 сакавіка Лукашэнка казаў Пуціну, што электрычнасьць на станцыю падалі нібыта зь Беларусі, але ў Кіеве гэта зьняпраўдзілі.
Украінская кампанія «Енергоатом» а 12.30 паведаміла, што ў другі раз аднавіла энэргазабесьпячэньне Чарнобыльскай АЭС. Але ўкраінскія атамнікі не выключаюць новых выпадкаў адключэньня.
«Пэрсанал ЧАЭС, які не зьмяняўся з пачатку вайсковай агрэсіі Расеі, зьнясілены псыхалягічна і фізычна, і ня можа забясьпечыць якаснае ўтрыманьне станцыі. Адзінай гарантыяй бясьпекі ЧАЭС ёсьць поўны вывад расейскіх войскаў са станцыі», – заявілі ва ўкраінскай кампаніі.
Праз паўгадзіны кампанія «Укренерго» паведаміла, што лінія зноў пашкоджана і ЧАЭС зноў засталася без электрычнасьці.
Удзень 13 сакавіка стала вядома пра чатыры эпіцэнтры пажару ў зоне адчужэньня. Пакуль невядома, ці павялічваецца іхная плошча.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
