«У другой палове году імпульс для экспарту аслабне ва ўмовах стабілізацыі вонкавага попыту і ўзмацненьня замежнага эканамічнага ціску на эканоміку краіны. На ўнутраны попыт працягнуць ўплываць высокая няпэўнасьць, запаволеньне росту даходаў насельніцтва і павелічэньне кошту крэдытаваньня», — адзначаецца ў апублікаваным аглядзе.
Аналітыкі ўказваюць таксама на тое, што курс беларускага рубля да валют краін –асноўных гандлёвых партнэраў можа аслабнуць, калі рост вонкавага попыту замарудзіцца і пачнуць праяўляцца эфэкты санкцый.
Інфляцыя па выніках ліпеня зафіксавалася ў межах 10%, пры гэтым захоўваюцца рызыкі фармаваньня яе на больш высокім узроўні. Сярод іншага ў банку адзначаюць аслабленьне падтрымкі эканамічнай палітыкі з боку бюджэту.
«Мы дапускаем, што ў другой палове году аб’ём бюджэтных выдаткаў адносна ВУП наблізіцца да леташняга. Аднак у цэлым па выніках году выдаткі будуць ніжэй за ўзровень 2020-га адносна ВУП ва ўмовах абмежаваных бюджэтных рэзэрваў і вялікіх аб’ёмаў выплат па дзяржаўным доўгу», — падсумавалі экспэрты Эўразійскага банку разьвіцьця.
