Пра гэта Фабрыс Лежэры заявіў 12 ліпеня на сумесным пасяджэньні камітэтаў Эўрапарлямэнту па замежных справах і па грамадзянскіх свабодах, юстыцыі і ўнутраных справах, паведамляе брусэльскі карэспандэнт Радыё Свабода Рыкард Юзьвяк.
Чым канкрэтна дапамогуць
«Мы атрымалі запыт на разгортваньне пастаяннай групы [на мяжы зь Беларусьсю. — РС]. Запыт тычыўся 30 супрацоўнікаў памежнай службы, памежнага нагляду, 14 патрульных машын і аднаго транспартнага сродку цеплавога бачаньня, аднаго верталёта», — сказаў Лежэры.
«Да 14 ліпеня, а значыць, да сярэдзіны гэтага тыдня, мы чакаем, што ў Літве будзе 10 дадатковых супрацоўнікаў пастаяннай групы другой катэгорыі, якіх можна будзе разьмясьціць са зброяй для патруляваньня сухапутнай мяжы, а таксама шэсьць афіцэраў першай катэгорыі, якія могуць палепшыць збор зьвестак і аналіз рызыкі. У наступныя дні ў нас зьявяцца дадатковыя патрульныя машыны, і мы разьлічваем, што вельмі хутка зьявяцца 13 патрульных машын Frontex», — удакладніў Лежэры.
«Вельмі важным момантам зьяўляецца фінансавая падтрымка. Эўрапейская камісія гатовая падтрымаць Літву ў рэагаваньні на гэтую надзённую сытуацыю і забесьпячэньні найбольш актуальных патрэб уцекачоў сродкамі ў памеры 10 мільёнаў эўра», – сказала эўракамісарка па ўнутраных справах Ільва Югансан.
Сьведчаньні мігрантаў
Выступаючы на згаданым пасяджэньні, міністарка ўнутраных спраў Літвы Агне Білатайце сказала:
«Беларускія памежнікі выдатна ведаюць пра кантрабанду мігрантаў і, магчыма, нават удзельнічаюць у гэтым. Некаторыя нерэгулярныя мігранты заяўлялі ў сваіх інтэрвію, што людзі, якія носяць вайсковую форму, удзельнічаюць у працэсе і аддаюць загады».
«Закрыць усходнеэўрапейскі шлях»
«Нам патрэбна адчувальная палітычная, фінансавая і апэратыўная падтрымка, каб разьвязаць цяперашнюю сытуацыю і прадухіліць яе далейшае пагаршэньне. Разам нам трэба спыніць гэты паток, закрыць гэты ўсходнеэўрапейскі шлях і прадухіліць другаснае перамяшчэньне ў іншыя дзяржавы ЭЗ. Лукашэнка не павінен мець магчымасьці пагражаць Эўразьвязу міграцыяй», — падкрэсьліла Білатайце.
Візавы рэжым для беларусаў пад пагрозай
Тым часам эўракамісарка па ўнутраных справах Ільва Югансан ня выключыла магчымасьці, што праз сытуацыю на літоўска-беларускай мяжы Эўразьвяз прыпыніць выдаваньне візаў беларусам.
«Я адказваю і за візавую палітыку, і я павінна сказаць, што гатовая разгледзець магчымасьць дзеяньняў па прыпыненьні візавага рэжыму датычна Беларусі ў гэтай сытуацыі. Зразумела, мы павінны забясьпечыць падтрыманьне кантактаў з шараговымі беларусамі. Тым ня менш я лічу, што гэтае пытаньне можна разгледзець», — сказала Югансан.
Падобным чынам выказаўся і кіраўнік зьнешняй палітыкі ЭЗ Жузэп Бурэль, які 12 ліпеня заявіў, што ЭЗ разглядае магчымасьць далейшых захадаў супраць Беларусі.
- Сёлета колькасьць нерэгулярных мігрантаў, якія прыбываюць у Літву празь Беларусь, перасягнула 1600 чалавек. Гэта ў 22 разы больш, чым летась.
- Плот на мяжы зь Беларусьсю, які хоча пабудаваць Літва, будзе каштаваць ёй больш як 40 млн эўра.
- У чэрвені і ліпені Аляксандр Лукашэнка заяўляў, што пасьля ўвядзеньня Эўразьвязам санкцый Беларусь ня будзе абараняць Эўропу ад нелегальнай міграцыі, наркатрафіку і кантрабанды.
