На лаве падсудных Андрэй Іванюшын, Мікіта Афанасьеў, Мікіта Трацьцякевіч. Інцыдэнт адбыўся 19 верасьня каля гандлёвага цэнтру «Эўропа», калі невядомыя пачалі затрымліваць аднаго з матацыклістаў, а астатнія яго абаранялі. Акрамя гвалту адносна супрацоўніка сілавых органаў, іх судзяць і за пашкоджанае аўто, піша «Вясна».
Адзін зь відавочцаў паведамляў, што матацыклісты абаранялі калегу і выцягвалі яго з машыны невядомых людзей. Пачалася бойка, хтосьці выцягнуў ключы ў з машыны. Калі хлопца ўжо выцягнулі, грамадзянін у цывільным, які потым выявіўся міліцыянтам з ГУБАЗіКу, дастаў нешта падобнае да пісталета, што зафіксавана на відэа. Пры гэтым міліцыянт не называў сваёй прафэсіі і не паказваў ніякіх дакумэнтаў.
Справу разглядае судзьдзя Аляксандар Воўк. На працэс у залю пусьцілі па пашпартах толькі нешматлікіх родных і прадстаўнікоў СМІ — усяго каля 10 чалавек. Афіцыйнае абгрунтаваньне — «пандэмія».
