Мы сабралі для вас навіны зь Беларусі і сьвету, датычныя каранавірусу, за 12 траўня.
Каранавірус у Беларусі і ў сьвеце. Як разьвіваюцца падзеі >>
- Затрыманьні мірных дэманстрантаў у Беларусі выклікаюць асаблівую занепакоенасьць у сувязі з прэзыдэнцкімі выбарамі, заявіў прэс-сакратар Эўрапейскай службы зьнешніх дзеяньняў Пэтэр Стана. Ён падкрэсьліў, што затрыманьні, якія прайшлі ў апошнія дні, і суды над дзясяткамі ўдзельнікаў мірных акцый «парушаюць асноватворную свабоду сходаў», якая «зьяўляецца краевугольным каменем дэмакратыі, і беларускія ўлады абавязаныя паважаць і абараняць яе ў адпаведнасьці зь міжнароднымі абавязацельствамі краіны».
- Міністэрства аховы здароўя Беларусі апублікавала 12 траўня ў сваім Telegram-канале новую афіцыйную статыстыку распаўсюду COVID-19. Агулам 24873 чалавекі са станоўчым тэстам на COVID-19 (у іх лік уваходзяць ачунялыя і памерлыя). 142 памерлыя. Гэта значыць, за дзень выявілі яшчэ 967 выпадкаў і прызналі яшчэ 7 сьмерцяў.
- Аляксандар Лукашэнка падчас нарады 12 траўня заявіў, што ў цяперашніх эпідэміялягічных умовах галоўнае не статыстыка колькасьці хворых, а ўратаваньне жыцьця людзей.
- Лекары паведамілі Аляксандру Кабанаву пра станоўчы тэст на COVID-19.Блогеры Аляксандар Кабанаў і Сяргей Пятрухін цяпер знаходзяцца ў Берасьцейскай цэнтральнай гарадзкой бальніцы. Аляксандар Кабанаў трапіў туды 9 траўня пасьля таго, як сам выклікаў хуткую дапамогу, бо дрэнна сябе адчуваў.
- Колькасьць вакансій у Беларусі з пачатку 2020 году скарацілася на 14%
- Лёндан да кастрычніка будзе плаціць па 2,5 тысячы фунтаў адпраўленым у адпачынкі праз COVID-19.
- У Кітаі ўлады гораду Ўхань, адкуль у канцы мінулага году пачаў пашырацца новы каранавірус, які выклікае COVID-19, правядуць масавае тэставаньне ўсіх жыхароў. Пра гэта піша Reuters са спасылкай на дакумэнт гарадзкіх уладаў і свае крыніцы. Аналізы з выкарыстаньнем нуклеінавых кіслот будуць рабіць на працягу 10 дзён.
