У выніку дарожна-транспартнага здарэньня каля народнага мэмарыялу ахвярам сталінскіх рэпрэсіяў у Курапатах пашкоджаны мэталічны крыж, пастаўлены актывістамі, а таксама сеткавая агароджа, зробленая камунальнымі службамі.
Паводле ініцыятара курапацкай вахты Паўла Севярынца, ДТЗ адбылося з боку пасёлку Сонечнага, аўтамабіль з праезнай часткі вынесла проста на ахоўную зону. У выніку быў зьбіты крыж, паламаная агароджа і засталася баразна на ўзгорку.
Абставінаў аварыі Дзяржаўтаінспэкцыя не паведамляе, легкавік пазьней быў вывезены эвакуатарам. Актывісты вырашаюць, якім чынам будуць аднаўляцца пашкоджаныя элемэнты мэмарыялу.
Як сказаў Свабодзе адказны сакратар Кансэрватыўна-хрысьціянскай партыі БНФ Алесь Чахольскі, згодна з заканадаўствам, кампэнсаваць выдаткі мусіць вінаваты ў здарэньні.
Агароджа — гэта прэрагатыва Бараўлянскага лясгасу. А вось крыж фактычна патрабуе замены, бо ў аснове ён вывернуты і ў такім выглядзе вяртаньне на месца не ўяўляецца магчымым.
Па словах палітыка, гэта нагода запатрабаваць ад уладаў вярнуць 24 крыжы, экспрапрыяваныя камунальнікамі пад выглядам «добраўпарадкаваньня» тэрыторыі.
Крыжалом у Курапатах. Што важна ведаць
У Курапатах 4 красавіка зьнесьлі 70 крыжоў, якія стаялі ўздоўж МКАД і пачалі ўсталёўваць плот. 13 красавіка зьнесьлі ўсе мэталічныя крыжы ўздоўж кальцавой дарогі.
Ці законна гэта? Суд па крыжах у Курапатах меў адбыцца пасьля 19 красавіка. Прэс-сакратарка кіраўніка Беларусі Натальля Эйсмант патлумачыла працы ў Курапатах распараджэньнем Аляксандра Лукашэнкі.
Як адрэагавалі людзі? Увечары 4 красавіка памаліцца ў Курапаты прыйшлі больш за 200 чалавек. Яны прайшлі крыжовым шляхам да месца, дзе зносілі крыжы. Цягам красавіка за Курапаты моляцца ў розных гарадах і мястэчках Беларусі.
Малітва за Беларусь на крыжовым шляху. ФОТАГАЛЕРЭЯ
Рэакцыю палітыкаў, грамадзкіх актывістаў і публічных асоб можна пачытаць тут.
Што такое Курапаты?
Курапаты – лясны масіў на поўначы Менску, дзе ў 1937–1941 гадах супрацоўнікі НКВД расстрэльвалі людзей.
Пра масавыя расстрэлы ў Курапатах шырока стала вядома ў 1988 годзе пасьля выхаду артыкула Зянона Пазьняка і Яўгена Шмыгалёва «Курапаты – дарога сьмерці».
Колькі там забілі? Гэта невядома дакладна — архівы НВКД і КГБ не раскрытыя, ды й магчыма, што нават у іх няма поўнага сьпісу расстраляных за час рэпрэсіяў.
Паводле розных падлікаў, карнікі НКВД расстралялі ў Курапатах з 1937 па 1941 гады ад 30 тысяч (першае сьледзтва, што вяла пракуратура БССР) да 250 тысяч чалавек.
Ці не нацысты гэта забівалі? Не, бальшавікі.
Аляксандар Лукашэнка заяўляў у 2015 годзе, нібы яшчэ не вядома дакладна, хто забіваў у Курапатах — бальшавікі ці нацысты. Пасьля выкрыцьця Курапатаў розныя групы спрабавалі знайсьці ў іх «нямецкі сьлед», але раз за разам гэта абвяргалі сьледчыя.
