У беларускіх аптэках ад сёньня аптэках уводзяцца абмежаваньні на продаж некаторых лекаў і сродкаў аховы ва ўмовах пандэміі каранавірусу.
Каранавірус у Беларусі і ў сьвеце. Як разьвіваюцца падзеі >>
Міністэрства здароўя Беларусі разаслала аптэкам ліст з подпісам намесьніцы міністра Алены Богдан. Паводле рашэньня Мінздароўя, з 10 красавіка па 1 ліпеня абвешчаныя абмежаваньні на продаж некаторых лекаў і сродкаў аховы ад інфэкцый.
Цяпер у аптэках пакупнікам у адны рукі можна набыць ня больш за:
- 40 таблетак парацэтамолу,
- 40 таблетак арпэтолу,
- 20 капсул прэпарату флустоп,
- 2 дэзынфэктары для рук аб’ёмам да 100 мл,
- дызынфэктар аб’ёмам менш за 1 літар — 1 штуку,
- 10 масак,
- 5 пар пальчатак.
Намесьніца генэральнага дырэктара РУП «Белфармацыя» Алена Ганчарова заявіла Свабодзе, што гэта вымушаная мера, бо пачаўся нездаровы ажыятаж: людзі запасаюцца лекамі, сродкамі абароны, скупляюць іх у аптэках:
«Народ пачаў масава скупляць лекі, займацца самалячэньнем, так і да каранавірусу не дажыве — печань пасадзіць».
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
