Андрэй Бандарэнка, які прэтэндаваў на пасаду дырэктара незалежнага выданьня «БелГазета», выйграў суд у асноўнага ўласьніка газэты Кірыла Жываловіча, піша «Эўрарадыё».
Судзьдзя Зінаіда Красоўская часткова задаволіла патрабаваньні Бандарэнкі. Яна абавязала Жываловіча абвергнуць фразы, у якіх ён называў Бандарэнку «афэрыстам», «прайдзісьветам» і «махляром» — гэтыя фразы судзьдзя прызнала не адпаведнымі рэчаіснасьці. Таксама яна абавязала Жываловіча сплаціць Бандарэнку кампэнсацыю маральнай шкоды ў 500 рублёў (той патрабаваў 40 тысячаў). Рашэньне не набыла моц і яшчэ можа быць абскарджанае.
18 красавіка судзьдзя Эканамічнага суду Менску задаволіла позву Жываловіча аб прызнаньні незаконным прызначэньня Бандарэнкі на пасаду дырэктара «БелГазеты»:
Нягледзячы на канфлікт, «БелГазета» працягвае выходзіць і на паперы, і ў інтэрнэце, хоць сайт на кароткі час «закрывалі з тэхнічных прычынаў». Адзін з нумароў дзяржава абмяжоўвала ў распаўсюдзе, але не праз канфлікт, а праз карыкатуру з каровамі і чыноўнікамі.
Канфлікт у «Белгазеце». Што важна ведаць
- 21 студзеня «Белгазету» узначаліў праваабаронца Андрэй Бандарэнка, рашэньне прыняў сход уласьнікаў выданьня.
- Былы дырэктар «Белгазеты» Кірыл Жываловіч назваў сход неправамерным і абвінаваціў Бандарэнку ў «рэйдэрскім захопе» выданьня. 23 студзеня Жываловіч прызначыў дырэктарам Юрыя Карэтнікава, лідэра колішняга руху «Правы альянс».
- 75% акцый выданьня належаць журналісту Кірылу Жываловічу, 25% — заснавальніку Ігару Высоцкаму.
- «Белорусская газета» было зарэгістравана ў 1995 годзе былымі супрацоўнікамі «Белорусской деловой газеты», з 2005 году выходзіць пад назвай «БелГазета».
