Гомельскі аблвыканкам і яго галоўнае ўпраўленьне ідэалягічнай працы, культуры і ў справах моладзі ня бачаць патрэбы ў стварэньні аргкамітэту для сьвяткаваньня 100-годзьдзя абвяшчэньня Беларускай Народнай Рэспублікі.
«Дата стварэньня БНР не зьяўляецца дзяржаўным сьвятам, якія вызначаны паводле Ўказу Прэзыдэнта Рэспублікі Беларусь ад 26 сакавіка 1998 году № 157 «Аб дзяржаўных сьвятах, сьвяточных днях і памятных датах у Рэспубліцы Беларусь», і не прадугледжвае маштабных мерапрыемстваў», — напісала ў адказе на ліст пісьменьніка Анатоля Бароўскага першая намесьніца начальніка ўпраўленьня ідэалёгіі Інга Заўгародняя.
Анатоль Бароўскі разам зь іншымі грамадзкімі актывістамі і навукоўцамі дасылаў у Гомельскі аблвыканкам прапановы наконт сьвяткаваньня ў рэгіёне 100-годзьдзя абвяшчэньня Беларускай Народнай Рэспублікі.
Што прапаноўвала грамадзкасьць
Грамадзянская супольнасьць Гомля выказалася за арганізацыю «круглых сталоў», цыкляў лекцый у вышэйшых і сярэдніх навучальных установах, публічных сустрэч прадстаўнікоў улады і навукоўцаў на базе архіўных установаў ды бібліятэк, падчас якіх ладзіліся б расповеды пра абвяшчэньне БНР як важны крок у справе ўтварэньня самастойнай беларускай дзяржавы.
Актывісты таксама прапанавалі Гомельскаму гарвыканкаму надаць адной з вуліц у горадзе імя Палуты Бадуновай — народнага сакратара апекі БНР, ураджэнкі Навабеліцы, альбо усталяваць у яе гонар памятную мэмарыяльную дошку.
Ідэалягічнае ўпраўленьне лічыць, што перайменаваньне вуліцы ў гонар дзяячкі БНР адносіцца да кампэтэнцыі тапанімічнай камісіі пры гарвыканкаме. Пра мэмарыяльную дошку ў адказе ані слова. У адказе нагадваецца таксама, што вучэбнай праграмай па прадмеце «Гісторыя Беларусі» ў Х клясе прадугледжана вывучэньне тэмы: «Абвяшчэньне Беларускай Народнай Рэспублікі».
«Улады цьмяна ўяўляюць беларускую будучыню»
Анатоль Бароўскі выказвае неўразуменьне з нагоды стаўленьня ідэолягаў да 100-гадовага юбілею абвяшчэньня БНР.
«Гэта не суадносіцца са здаровым сэнсам, беларускай нацыянальнай ідэяй. Бо незразумела, адкуль Беларусь узялася, дзе вытокі нашай дзяржаўнасьці», — кажа гомельскі пісьменьнік.
Яшчэ адзін падпісант звароту да ўладных структураў наконт сумеснага сьвяткаваньня 100-годзьдзя БНР Уладзімер Кацора бачыць у вышэйзгаданым адказе палітычны кантэкст.
«Там, дзе размова ідзе пра мінулае, гэта насамрэч размова пра дзень сёньняшні й будучы. Такі адказ уладаў — гэта прызнаньне таго, што яны даволі цьмяна ўяўляюць беларускую будучыню», — заяўляе Кацора.
