Лінкі ўнівэрсальнага доступу

Гамельчукі патрабуюць праверыць супрацоўнікаў АМАПу на дэтэктары хлусьні


Гомельскі раённы суд
Гомельскі раённы суд

Паўтара дзясятка жыхароў Гомеля, якія прысутнічалі на судзе па абвінавачваньні прадстаўніка незалежнага прафсаюзу РЭП Віктара Казлова ў дробным хуліганстве, накіравалі начальніку абласнога ўпраўленьня ўнутраных спраў Уладзімеру Захарчуку заяву пра зьдзяйсьненьне правапарушэньняў з боку супрацоўнікаў міліцыі.

Пра гэта Радыё Свабода распавёў праваабаронца, юрыст Леанід Судаленка:

Леанід Судаленка
Леанід Судаленка

«У заяве я і іншыя падпісанты ўказалі, што 4 красавіка прысутнічалі ў судзе Гомельскага раёну і чулі, як супрацоўнікі АМАПу Аляксандар Сярдзюк, Раман Курбатаў і Аляксандар Саўчанка, папярэджаныя судом пад подпіс пра адказнасьць за даваньне непраўдзівых паказаньняў, ілжэсьведчылі супраць Віктара Казлова. Іншымі словамі, учынілі адміністрацыйнае правапарушэньне паводле артыкулу 24.4 КаАП».

У пацьвярджэньне заяўнікі ўказалі, пра што менавіта згаданыя амапаўцы сьведчылі ў судзе: уранку 25 сакавіка, едучы на службовай аўтамашыне па вуліцы ў вёсцы Цярэшкавічы, чулі, як Віктар Казлоў «гучна лаяўся матам, на заўвагі не рэагаваў, пры затрыманьні аказаў супраціў».

Ілжэсьведчаньні абвяргаюцца мэдычнымі заключэньнямі, якія прафсаюзны актывіст падаў суду: пасьля апэрацыі на выдаленьне часткі лёгкага 67-гадовы Віктар Казлоў размаўляе толькі шэптам.

Віктар Казлоў
Віктар Казлоў

Ад імя грамадзкасьці падпісанты заяўляюць, што амапаўцы Сярдзюк, Курбатаў і Саўчанка ўчынілі грамадзка-небясьпечнае адміністрацыйнае правапарушэньне і, паводле закону «Аб органах унутраных спраў Рэспублікі Беларусь», паводле сваіх маральна-псыхалягічных якасьцяў ня маюць права знаходзіцца на службе ў міліцыі.

Заяўнікі патрабуюць адхіліць згаданых супрацоўнікаў АМАПу ад выкананьня службовых абавязкаў з тым, каб яны не ўчынілі новых правапарушэньняў, а таксама правесьці ў дачыненьні да іх службовую праверку на дэтэктары хлусьні і такім чынам вызначыць іх маральна-псыхалягічныя якасьці. Па выніках праверкі вырашыць, ці мэтазгодна працягваць ім службу ў органах унутраных спраў.

Леанід Судаленка дадае, што Аляксандар Сярдзюк яшчэ ў 2014 годзе «засьвяціўся» ў лжэсьведчаньні ў дачыненьні да гомельскага маладафронтаўца Андруся Цянюты, які таксама быў абвінавачаны ў лаянцы і размахваньні рукамі на пустой вуліцы апоўначы, літаральна за сотню крокаў ад свайго дому.

Тым часам разгляд адміністрацыйнай справы супраць Віктара Казлова, абвінавачанага амапаўцамі ў дробным хуліганстве і непадпарадкаваньні, мае быць працягнуты ў Гомельскім раённым судзе 13 красавіка.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG