«Марш недармаедаў» у Берасьці. Каля тысячы чалавек прайшлі па вуліцах гораду

Каля тысячы чалавек на Маршы «недармаедаў» у Берасьці. Фотагалерэя

У Берасьці сёньня прайшла чарговая вулічная акцыя супраць дэкрэту № 3 — так званага «падатку на дармаедзтва».

​

УЖЫВУЮ:

Старшыня Берасьцейскага гарвыканкаму паабяцаў шмат новых працоўных месцаў у будаўніцтве

Кіраўнік Берасьцейскай абласной арганізацыі АГП Уладзімер Вуек распавёў, што на перамовах са старшынём гарвыканкаму Аляксандрам Рагачуком людзі давялі яму патрабаваньні адмяніць дэкрэт № 3. Старшыня гарвыканкаму паабяцаў перадаць гэтае патрабаваньне «вышэйшым уладам».

Лябедзьку і Рымашэўскага выпусьцілі з РАУС Бярозы пасьля сканчэньня маршу ў Берасьці

Два разы па дарозе зь Менску да Берасьця старшыню партыі АГП Анатоля Лябедзьку і сустаршыню БХД Віталя Рымашэўскага затрымлівалі супрацоўнікі ДАІ. Затрыманьні каля Івацэвічаў і Бярозы, што на Берасьцейшчыне міліцыянты ажыцьцяўлялі пад пільным кантролем людзей у цывільным, кажа Анатоль Лябедзька. Мэта гэтых затрыманьняў толькі ў адным, лічыць старшыня АГП: «Проста не дапусьціць, каб мы патрапілі ў Берасьце на «Марш недармаедаў».

У Берасьці на марш недармаедаў выйшла каля тысячы чалавек

Акцыя доўжылася 2 гадзіны. 150 чалавек былі запрошаныя ў залю гарвыканкаму на сустрэчу са старшынём Аляксандрам Рагачуком. Каля тысячы чалавек узялі ўдзел у мітынгу і маршы па цэнтральных вуліцах горада. У авангардзе былі анархісты, актывісты апазыцыі, але большасьць натоўпу склалі звычайныя гараджане.

Людзі разыйшліся

Да Берасьця ўрэшце даехаў намесьнік старшыні АГП Мікалай Казлоў. Ён ехаў зь Бярозаўскага раёна, дзе машыну зь менскімі палітыкамі затрымалі, на перакладных аўтамабілях. Анатоль Лябедзька і Віталь Рымашэўскі дасюль знаходзяцца ў Бярозаўскім РАУС, паведаміў спадар Казлоў.

Натальля Папкова працягвае галадоўку

Менскі актывіст Артур Фінькевіч распавёў Свабодзе, што сёньня раніцай яны наведалі Натальлю Папкову ў псыхіятрычным дыспансэры. Натальля Папкова працягвае галадоўку, лекаў ёй не прызначалі, галоўны лекар паведаміў, што ў панядзелак аб 11-й гадзіне будзе камісія, і Натальлю, хутчэй за ўсё, выпусьцяць.

«Людзі нас падтрымалі», — лідэр пратэсту

Лідэр берасьцейскай акцыі недармаедаў Аляксандар Кабанаў выказаў у эфіры Свабоды сваё задавальненьне маршам:

«Людзі нас падтрымліваюць».

Акцыя скончылася

Людзі разыходзяцца. Анархісты сыходзяць разам, трымаючыся за рукі.

Пратэстоўцаў заклікалі на акцыю на Дзень волі

Акцыі будуць працягвацца, заявілі ля ЦУМу арганізатары маршу і заклікалі выходзіць 25 сакавіка ў Берасьці, а 11 сакавіка -- у Пінску.

Людзі занялі плошчу перад берасьцейскім ЦУМам.

Анархісты перакрылі рух на праспэкце Машэрава ў Берасьці, машыны сыгналяць. Бальшыня калёны — на ходніках.

Пратэстоўцы заблякавалі праспэкт Машэрава

У авангардзе калёны, якая спыніла рух машын на праспэкце Машэрава, былі анархісты, якія хацелі паказаць сваю рашучасьць, але праз некалькі хвілін рух машын аднавілі.

Шмат берасьцейцаў па ходу калёны далучаюцца да пратэстоўцаў, народу значна паболела.