Лінкі ўнівэрсальнага доступу

«Што будзе далей, залежыць ад нас», — удзельнікі сходу запатрабавалі спыніць будоўлю ля Курапатаў

абноўлена

23 лютага жыхары і актывісты правялі сход каля будоўлі офіснага цэнтру каля Курапацкага лесу. Яны запатрабавалі ад Менгарвыканаму спыніць будоўлю, якую лічаць незаконнай.

У сходзе ўзялі ўдзел палітыкі — адзін зь лідэраў БХД Павал Севярынец, старшыня Партыі БНФ Аляксей Янукевіч і лідэр «Маладога Фронту» Зьміцер Дашкевіч.

У сваім выступе Павал Севярынец сказаў, што месца, дзе вядзецца будоўля, уваходзіць у вельмі сур’ёзную ахоўную зону.

«Аднак гэтую зямлю прадалі на аўкцыёне. Гэта страшнае парушэньне закону», — сказаў Павал Севярынец.

Ён заклікаў падпісваць агульныя звароты ў дзяржаўныя ўстановы супраць распачатага будаўніцтва, а таксама дасылаць у Менгарвыканкам індывідуальныя звароты. Павал Севярынец таксама запрасіў прысутных прыйсьці на прыём да старшыні Менгарвыканкаму Шорца 1 сакавіка і «зрабіць дзень спыненьня будоўлі».

«Наш сход пераходзіць у пастаянную абарону. Калі будаўнікі адновяць працу, то мы зноў зьбяром сход», — сказаў Павал Севярынец.

Паводле Севярынца, супрацоўнікі «Зелянбуду» сьпілавалі ў Курапацкім лесе дрэвы, якія былі выкарыстаныя як слупы для агароджы, якой абнесеная будпляцоўка.

«Гэты крывавы плот вельмі нагадвае той плот, які быў у 30-х гадах. Наша патрабаваньне да ўладаў гораду — будоўлю гэтую спыніць», — сказаў Севярынец.

Палітык заклікаў мясцовых жыхароў падтрымаць пратэстоўцаў.

Аляксей Янукевіч у сваім выступе сказаў, што Таварыства аховы помнікаў зьвярнулася ў КДБ, каб адбылося расьсьледаваньне пачатага будаўніцтва.

«Тут карупцыя відавочная», — лічыць Янукевіч.

Зьміцер Дашкевіч сказаў, што абаронцам Курапатаў удалося запаволіць будоўлю, «але што будзе далей, залежыць ад нас».

Жыхары бліжэйшых дамоў таксама выказалі нязгоду з будаўнікамі. Адна з жанчын нагадала ў сваім выступе, што пытаньне пра будаўніцтва ўздымалі яшчэ ў сьнежні мінулага году. Аднак на запыты да ўладаў яны не атрымалі адказаў.

«Мы сабралі каля 800 подпісаў з чатырох дамоў пад зваротам. Давайце разам ахоўваць нашу тэрыторыю. Мы самі можам яе добраўпарадкаваць. Ці можна будаваць такія цэнтры на касьцях людзей?», — сказала выступоўца.

Будаўнікоў, якія выходзілі з пляцоўкі, прысутныя сустракалі воклічам «Ганьба!».

«Калі беларусы разам, то ніхто гэтую сілу не пераможа»

На сход у падтрымку абаронцаў Курапатаў сабралася больш за 50 чалавек: да актывістаў, якія аднавілі лягер пасьля начнога нападу, далучыліся жыхары суседніх дамоў.

Актывісты паставілі другі намёт, замест двух сарваных бел-чырвона-белых сьцягоў было прынесена шэсьць новых.

Заклікі спыніць будоўлю суправаджаліся бурнымі аплядысмэнтамі мітінгоўцаў. Удзельнікі мітынгу аднагалосна прагаласавалі за спыненьне будоўлі.

Палітыкі Павал Севярынец, Аляксей Янукевіч і Зьміцер Дашкевіч абвясьцілі свабодны мікрафон і запрасілі ўсіх ахвотных выступаць.

«Калі беларусы разам, то ніхто гэтую сілу не пераможа», — заявіў Севярынец.

Некаторыя мясцовыя жыхары прыйшлі на мітынг разам зь дзецьмі.

«Я далучылася да акцыі пратэсту, бо жыць тут хутка стане немагчыма», — сказала жыхарка аднаго з суседніх дамоў Сьвятлана. Жанчына прыйшла з усёй сямʼёй, каб падтрымаць абаронцаў Курапатаў.

«Увесь двор перагароджаны, „хуткая“ ня зможа падʼехаць, калі каму стане кепска. Унукам няма дзе гуляць. Дый мэмарыял — месца сьвятое, нельга будаваць тут розныя офісы», — сказала Сьвятлана.

Адзін з абаронцаў Курапатаў Алесь Кіркевіч, які быў паранены падчас нападу ўначы, вярнуўся ў лягер.

«Сёньня не плянуецца правакацыяў такога кшталту. Калі што і адбудзецца, то ў іншай форме. Мы з паплечнікамі будзем несьці вахту і надалей», — заявіў ён.

Падчас мітынгу актывісты зьбіралі подпісы пад чарговым калектыўным зваротам, які заўтра будзе перададзены ў Генпракуратуру і Міністэрства культуры.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG