Падзеі 13 сьнежня ў беларускай і ўсясьветнай гісторыі
Дата дня
12 сьнежня 1907 году нарадзіўся Мікалай Лапіцкі, настаяцель першай беларускай царквы на эміграцыі. У дзень абвяшчэньня незалежнасьці БНР ня раз чытаў у Кангрэсе ЗША прысьвечаную гэтай падзеі малітву.
Таксама ў гэты дзень
1620 — Ворша атрымала герб: у блакітным полі залаты паўмесяц, паміж ягонымі рагамі — срэбны крыж.
1913 — выйшаў першы нумар грамадзка-палітычнай газэты «Минчанин», якая выдавалася па-расейску каля году.
1919 — Пётра Крэчэўскі абраны старшынём Рады БНР. Ён выконваў гэтую функцыю да канца жыцьця, якое скончылася ў 1928 годзе на эміграцыі ў Празе.
1920 — на другім Усебеларускім зьезьдзе Саветаў прынятыя дапаўненьні да Канстытуцыі БССР і ратыфікаваная Рыская мірная дамова паміж Савецкай Расеяй і Польшчай. Зьезд выказаўся за перавод усіх дзяржаўных устаноў на беларускую мову.
1981 — генэрал Войцех Ярузэльскі абвясьціў у Польшчы ваеннае становішча.
2003 — вайскоўцы ЗША знайшлі ў схованцы і арыштавалі былога ірацкага прэзыдэнта Садама Хусэйна.
У гэты дзень нарадзіліся
1874 — Арнольд Шэнбэрг, аўстрыйскі кампазытар-мадэрніст.
1894 — Юліян Тувім, польскі паэт.
1919 — Валяр’яна Жолтак, мастачка, заслужаная дзяячка мастацтваў Беларусі.
1941 — Мікола Маляўка, беларускі паэт.
У памяці
1466 — памёр Данатэла, італьянскі мастак.
1867 — памёр Артур Гротгер, польскі мастак.
1919 — ня стала Платона Жуковіча, расейскага гісторыка Беларусі, Польшчы і Ўкраіны XVII–XVIII стагодзьдзяў.
Куды варта пайсьці і за чым сачыць заўтра, 13 сьнежня
У прасторы «Грай» 13 сьнежня «Арт Сядзіба» адзначыць пяцігодзьдзе свайго заснаваньня. За гэты час культурніцкая прастора правяла кампаніі па папулярызацыі нацыянальнага адзеньня і герба «Пагоня», раздала кілямэтры стужкі з арнамэнтам і правяла дзясяткі мерапрыемстваў.
На імпрэзе выступяць гурты Navi i Lepšy kvas, удзельнік украінскага шоў «Х-фактар» Пётар Клюеў і іншыя. Пачатак а 19-й гадзіне. Зарэгістравацца на пяцігодзьдзе «Арт Сядзібы» можна тут.
Імпрэзы і выставы
Вершы «Ідалапаклоньніцы»
13 сьнежня адбудзецца прэзэнтацыя тома вершаў «Ідалапаклоньніца» польскай паэткі Галіны Пасьвятоўскай у перакладзе на беларускую мову. Яе называлі «польскай Сафо», але яна вельмі крытычна ставілася да сваіх вершаў. Выйшла замуж у 18 гадоў, а заўдавела ў 20. Галіна Пасьвятоўская не баялася сьмерці, але памерла ў 32 гады.
Менск, кнігарня «Кніжная Шафа» (пр. Дзяржынскага 9, уваход са двара).
Пачатак у 19:00.
Уваход вольны.
Адкрыцьцё выставы, прысьвечанай 125-годзьдзю Багдановіча
Мастакі зладзяць выставу ў музэі Максіма Багдановіча ў Горадні. Бацькі паэта пераехалі ў Горадню праз 8 месяцаў пасьля яго нараджэньня. Тут прайшло раньняе дзяцінства будучага паэта.
Горадня, Дом-музэй Максіма Багдановіча (вул. 1 Траўня, 10).
На працягу дня.
Уваход па квітку ў музэй.
