Лінкі ўнівэрсальнага доступу

«Гавары праўду» выступіла супраць рэфэрэндуму, які прапануе «шкодныя» зьмены


Андрэй Дзьмітрыеў

Андрэй Дзьмітрыеў

Кампанія «Гавары праўду» выказалася пра ініцыятыву правесьці рэфэрэндум, на які прапануецца вынесьці пытаньне аб павелічэньні тэрмінаў паўнамоцтваў: прэзыдэнта — да сямі гадоў, і парлямэнта — да пяці.

«Гавары праўду» выступае супраць гэтай «пустой і дарагой» ініцыятывы, якая «замест правядзеньня важных і патрэбных для беларусаў рэформаў у эканоміцы, сацыяльнай сфэры і палітыцы прапануе шкодныя для разьвіцьця краіны і грамадзтва зьмены».

У заяве, распаўсюджанай 30 лістапада, «Гавары праўду» прапанавала прэзыдэнту, ураду і парлямэнту рэалізаваць шэраг ініцыятываў:

— Значна зьменшыць адміністрацыйную і падатковую нагрузку на малы і сярэдні бізнэс;

— Адмяніць антыканстытуцыйны «падатак на дармаедаў»;

— Уключыць у страхавы стаж для налічэньня пэнсій тэрміновую службу ў войску, дэкрэтны адпачынак і догляд інвалідаў і састарэлых;

— Павысіць дапамогу па беспрацоўі да ўзроўню пражытковага мінімуму;

— У бюджэце 2017 году скараціць выдаткі на ўтрыманьне дзяржапарату, ідэалягічнай вэртыкалі, функцыянэраў грамадзкіх абʼяднаньняў, падтрымку безнадзейна стратных прадпрыемстваў. Зэканомленыя сродкі накіраваць на эканамічнае разьвіцьцё краіны і сацыяльную падтрымку насельніцтва.

Лідэр «Гавары праўду» Андрэй Дзьмітрыеў у камэнтары да заявы сказаў:

«Калі б тыя, хто цяпер прапануе павялічыць тэрмін паўнамоцтваў прэзыдэнта і парлямэнту, ішлі на выбары з такой ідэяй, то ў любой залі Беларусі атрымалі б замест грамадзкай падтрымкі тухлыя яйкі і гнілыя памідоры. Замест такой палітычнай крывадушнасьці мы прапануем сёньня парлямэнту правесьці грамадзкія слуханьні па сапраўды важных для людзей праблемах. У нашым жыцьці іх цяпер вышэй за дах, а ў парлямэнце пра іх ня чуюць».

Старшыня ЦВК Лідзія Ярмошына заявіла, што рэфэрэндум аб павелічэньні тэрмінаў паўнамоцтваў прэзыдэнта Беларусі і дэпутатаў Палаты прадстаўнікоў можа адбыцца, «калі на тое будзе воля кіраўніка дзяржавы»:

«Сама прапанова ні ў чым не супярэчыць міжнароднай практыцы. І яе рэалізацыя ў пэўным пляне магла б спрыяць стабільнасьці грамадзтва і некаторай эканоміі выдаткаў на выбары».

Паказаць камэнтары

XS
SM
MD
LG