Украіна падала ў ААН праект рэзалюцыі пра выкананьне правоў чалавека ў Крыме, заклікаўшы Расею даць міжнародным назіральнікам доступ на тэрыторыю анэксаванага паўвострава. Пра гэта паведамляе агенцтва France-Presse. Суаўтарамі дакумэнту выступілі 38 краін, уключаючы ЗША, Вялікую Брытанію і Францыю.
У рэзалюцыі асуджаецца парушэньне правоў чалавека ў Крыме, у тым ліку крымскіх татараў і ўкраінцаў. Акрамя таго, дакумэнт заклікае Расею «неадкладна адмяніць» рашэньне аб прызнаньні мэджлісу крымска-татарскага народу экстрэмісцкай арганізацыяй.
Яшчэ адным патрабаваньнем рэзалюцыі зьяўляецца бесьперашкодны доступ на тэрыторыю анэксаванага Расеяй Крыму міжнародных назіральнікаў для падрыхтоўкі дакладу аб сытуацыі з правамі чалавека на паўвостраве.
Прадстаўнік Украіны пры ААН Уладзімер Ельчанка, выступаючы на пасяджэньні, заявіў, што два з паловай мільёны жыхароў Крыму «пакутуюць ад аўтарытарнага рэжыму, напалоханыя, бездапаможныя і пазбаўленыя магчымасьці абараняць свае правы».
Намесьнік пастаяннага прадстаўніка Расеі пры ААН Яўген Загайнаў назваў прадстаўлены дакумэнт аднабаковым і абвінаваціў Украіну ва «ўзмацненьні інфармацыйнай кампаніі супраць Расеі ў спробе аказаць ціск на Маскву».
Расея анэксавала Крым у сакавіку 2014 году пасьля рэфэрэндуму, арганізаванага прарасейскімі ўладамі. Украіна і міжнародная супольнасьць не прызнаюць вынікаў галасаваньня.
8 лістапада міністры фінансаў краін Эўрапейскага зьвязу ўзгаднілі новыя санкцыі ў дачыненьні да чыноўнікаў анэксаванага Расеяй Крыму.
