Лінкі ўнівэрсальнага доступу

Сярод эўрапейскіх палітыкаў расьце недавер да гандлёвага супрацоўніцтва з ЗША


Францыя хоча спыніць перамовы па дамове паміж ЗША і ЭЗ аб Трансатлянтычным гандлёвым і інвэстыцыйным партнэрстве. Пра гэта 30 жніўня абвясьціў у эфіры радыёстанцыі RMC дзяржсакратар Францыі па справах зьнешняга гандлю Маціяс Фэкль.

Выступаючы ў Парыжы ў аўторак, на штогадовай сустрэчы з францускімі пасламі, прэзыдэнт Францыі Франсуа Алянд заклікаў прыпыніць перамовы аб падпісаньні пагадненьня аб свабодным гандлі паміж ЭЗ і ЗША — да абраньня новага амэрыканскага прэзыдэнта.

Да гэтага ж заклікаў сакратар Францыі па зьнешнім гандлі Маціяс Фэкль, адзначыўшы, што абмеркаваньне трансатлянтычнага пакту павінна пачацца на новай аснове. «Палітычнай падтрымкі гэтай дамовы ў Францыі больш няма», — заявіў Фэкль.

Францыя мае намер зьвярнуцца з адпаведным запытам у кіраўніцтва ЭЗ на саміце ў Браціславе, які адкрываецца 16 верасьня.

У мінулую нядзелю міністар эканомікі Нямеччыны сацыял-дэмакрат Зігмар Габрыэль заявіў, што гандлёвыя перамовы з ЗША праваліліся. «Мы не павінны падпарадкоўвацца амэрыканскім патрабаваньням. У нас у Эўропе свой уласны ўклад жыцьця», — адзначыў ён. Аднак у панядзелак Эўракамісія заявіла пра неабходнасьць працягу перамоваў.

Перамовы па пагадненьні паміж ЗША і ЭЗ аб Трансатлянтычным гандлёвым і інвэстыцыйным партнэрстве працягваюцца ўжо тры гады і павінны былі завяршыцца сёлета.

Паказаць камэнтары

XS
SM
MD
LG