У цэнтры сталіцы Чэхіі прыхільнікі радыкальнага руху «Ініцыятыва супраць ісламізацыі» ў нядзелю інсцэнавалі ўварваньне джыхадыстаў, паведамляе Радыё Прага.
Лідэр Ініцыятывы Марцін Конвічка прыбыў на адну з цэнтральных плошчаў на вярблюдзе ў суправаджэньні сваіх прыхільнікаў. Яны былі апранутыя ў касьцюмы, якія нагадваюць вопратку членаў экстрэмісцкай групоўкі «Ісламская дзяржава». Удзельнікі акцыі выкрыквалі ісламісцкія лёзунгі і стралялі пістонамі ў паветра. Акцыя выклікала паніку сярод людзей, якія гулялі па плошчы. Мерапрыемства перапынілі супрацоўнікі паліцыі. Улады не выключаюць, што арганізатары будуць прыцягнутыя да адказнасьці.
Конвічку неаднаразова абвінавачвалі ў распальваньні рэлігійнай нянавісьці на публічных выступах. У дачыненьні да лідэра «Ініцыятывы супраць ісламізацыі» вядзецца сьледзтва, яму пагражае турэмны тэрмін да 3 гадоў.
Краіны Цэнтральнай Эўропы выступаюць супраць абавязковых квот на прыём уцекачоў, прынятых Эўразьвязам у 2015 годзе. Большасьць мігрантаў прыбываюць з краін Блізкага Ўсходу і вызнаюць іслам. Пасьля летніх нападаў у эўрапейскіх краінах, частку зь якіх зьдзейсьнілі ўцекачы, прэзыдэнт Чэхіі Мілаш Зэман адмовіўся даваць прытулак па квотах Эўразьвязу, баючыся, як ён выказаўся, «барбарскіх нападаў».
